Rig Veda · Chapter 1.019
prati tyaṁ cārum adhvaraṁ gopīthāya pra hūyase |
marudbhir agna ā gahi ||
nahi devo na martyo mahas tava kratum paraḥ |
marudbhir agna ā gahi ||
ye maho rajaso vidur viśve devāso adruhaḥ |
marudbhir agna ā gahi ||
ya ugrā arkam ānṛcur anādhṛṣṭāsa ojasā |
marudbhir agna ā gahi ||
ye śubhrā ghoravarpasaḥ sukṣatrāso riśādasaḥ |
marudbhir agna ā gahi ||
ye nākasyādhi rocane divi devāsa āsate |
marudbhir agna ā gahi ||
ya īṅkhayanti parvatān tiraḥ samudram arṇavam |
marudbhir agna ā gahi ||
ā ye tanvanti raśmibhis tiraḥ samudram ojasā |
marudbhir agna ā gahi ||
abhi tvā pūrvapītaye sṛjāmi somyam madhu |
marudbhir agna ā gahi ||
Original text: Ṛgveda-Saṃhitā · Edition: Theodor Aufrecht Die Hymnen des Rigveda. Mandala I-VI Bonn Mareus Theodor Aufrecht Die Hymnen des Rigveda. Mandala VII-X Bonn Mareus · Data entry Barend A. Van Nooten Gary B. Holland · GRETIL (Göttingen) · CC BY-NC-SA 4.0