ઋગ્વેદ · અધ્યાય 1.018

સોમાનં સ્વરણં કૃણુહિ બ્રહ્મણસ્ પતે ।
કક્ષીવન્તં ય ઔશિજઃ ॥

યો રેવાન્ યો અમીવહા વસુવિત્ પુષ્ટિવર્ધનઃ ।
સ નઃ સિષક્તુ યસ્ તુરઃ ॥

મા નઃ શંસો અરરુષો ધૂર્તિઃ પ્રણઙ્ મર્ત્યસ્ય ।
રક્ષા ણો બ્રહ્મણસ્ પતે ॥

સ ઘા વીરો ન રિષ્યતિ યમ્ ઇન્દ્રો બ્રહ્મણસ્ પતિઃ ।
સોમો હિનોતિ મર્ત્યમ્ ॥

ત્વં તમ્ બ્રહ્મણસ્ પતે સોમ ઇન્દ્રશ્ ચ મર્ત્યમ્ ।
દક્ષિણા પાત્વ્ અંહસઃ ॥

સદસસ્ પતિમ્ અદ્ભુતમ્ પ્રિયમ્ ઇન્દ્રસ્ય કામ્યમ્ ।
સનિમ્ મેધામ્ અયાસિષમ્ ॥

યસ્માદ્ ઋતે ન સિધ્યતિ યજ્ઞો વિપશ્ચિતશ્ ચન ।
સ ધીનાં યોગમ્ ઇન્વતિ ॥

આદ્ ઋધ્નોતિ હવિષ્કૃતિમ્ પ્રાઞ્ચં કૃણોત્ય્ અધ્વરમ્ ।
હોત્રા દેવેષુ ગચ્છતિ ॥

નરાશંસં સુધૃષ્ટમમ્ અપશ્યં સપ્રથસ્તમમ્ ।
દિવો ન સદ્મમખસમ્ ॥