Rig Veda · Chapter 1.016

ā tvā vahantu harayo vṛṣaṇaṁ somapītaye |
indra tvā sūracakṣasaḥ ||

imā dhānā ghṛtasnuvo harī ihopa vakṣataḥ |
indraṁ sukhatame rathe ||

indram prātar havāmaha indram prayaty adhvare |
indraṁ somasya pītaye ||

upa naḥ sutam ā gahi haribhir indra keśibhiḥ |
sute hi tvā havāmahe ||

semaṁ naḥ stomam ā gahy upedaṁ savanaṁ sutam |
gauro na tṛṣitaḥ piba ||

ime somāsa indavaḥ sutāso adhi barhiṣi |
tām̐ indra sahase piba ||

ayaṁ te stomo agriyo hṛdispṛg astu śaṁtamaḥ |
athā somaṁ sutam piba ||

viśvam it savanaṁ sutam indro madāya gacchati |
vṛtrahā somapītaye ||

semaṁ naḥ kāmam ā pṛṇa gobhir aśvaiḥ śatakrato |
stavāma tvā svādhyaḥ ||