Rig Veda · Chapter 1.015

indra somam piba ṛtunā tvā viśantv indavaḥ |
matsarāsas tadokasaḥ ||

marutaḥ pibata ṛtunā potrād yajñam punītana |
yūyaṁ hi ṣṭhā sudānavaḥ ||

abhi yajñaṁ gṛṇīhi no gnāvo neṣṭaḥ piba ṛtunā |
tvaṁ hi ratnadhā asi ||

agne devām̐ ihā vaha sādayā yoniṣu triṣu |
pari bhūṣa piba ṛtunā ||

brāhmaṇād indra rādhasaḥ pibā somam ṛtūm̐r anu |
taved dhi sakhyam astṛtam ||

yuvaṁ dakṣaṁ dhṛtavrata mitrāvaruṇa dūḻabham |
ṛtunā yajñam āśāthe ||

draviṇodā draviṇaso grāvahastāso adhvare |
yajñeṣu devam īḻate ||

draviṇodā dadātu no vasūni yāni śṛṇvire |
deveṣu tā vanāmahe ||

draviṇodāḥ pipīṣati juhota pra ca tiṣṭhata |
neṣṭrād ṛtubhir iṣyata ||

yat tvā turīyam ṛtubhir draviṇodo yajāmahe |
adha smā no dadir bhava ||

aśvinā pibatam madhu dīdyagnī śucivratā |
ṛtunā yajñavāhasā ||

gārhapatyena santya ṛtunā yajñanīr asi |
devān devayate yaja ||