ઋગ્વેદ · અધ્યાય 1.016

આ ત્વા વહન્તુ હરયો વૃષણં સોમપીતયે ।
ઇન્દ્ર ત્વા સૂરચક્ષસઃ ॥

ઇમા ધાના ઘૃતસ્નુવો હરી ઇહોપ વક્ષતઃ ।
ઇન્દ્રં સુખતમે રથે ॥

ઇન્દ્રમ્ પ્રાતર્ હવામહ ઇન્દ્રમ્ પ્રયત્ય્ અધ્વરે ।
ઇન્દ્રં સોમસ્ય પીતયે ॥

ઉપ નઃ સુતમ્ આ ગહિ હરિભિર્ ઇન્દ્ર કેશિભિઃ ।
સુતે હિ ત્વા હવામહે ॥

સેમં નઃ સ્તોમમ્ આ ગહ્ય્ ઉપેદં સવનં સુતમ્ ।
ગૌરો ન તૃષિતઃ પિબ ॥

ઇમે સોમાસ ઇન્દવઃ સુતાસો અધિ બર્હિષિ ।
તાઁ ઇન્દ્ર સહસે પિબ ॥

અયં તે સ્તોમો અગ્રિયો હૃદિસ્પૃગ્ અસ્તુ શંતમઃ ।
અથા સોમં સુતમ્ પિબ ॥

વિશ્વમ્ ઇત્ સવનં સુતમ્ ઇન્દ્રો મદાય ગચ્છતિ ।
વૃત્રહા સોમપીતયે ॥

સેમં નઃ કામમ્ આ પૃણ ગોભિર્ અશ્વૈઃ શતક્રતો ।
સ્તવામ ત્વા સ્વાધ્યઃ ॥