Rig Veda · Chapter 1.014

aibhir agne duvo giro viśvebhiḥ somapītaye |
devebhir yāhi yakṣi ca ||

ā tvā kaṇvā ahūṣata gṛṇanti vipra te dhiyaḥ |
devebhir agna ā gahi ||

indravāyū bṛhaspatim mitrāgnim pūṣaṇam bhagam |
ādityān mārutaṁ gaṇam ||

pra vo bhriyanta indavo matsarā mādayiṣṇavaḥ |
drapsā madhvaś camūṣadaḥ ||

īḻate tvām avasyavaḥ kaṇvāso vṛktabarhiṣaḥ |
haviṣmanto araṁkṛtaḥ ||

ghṛtapṛṣṭhā manoyujo ye tvā vahanti vahnayaḥ |
ā devān somapītaye ||

tān yajatrām̐ ṛtāvṛdho 'gne patnīvatas kṛdhi |
madhvaḥ sujihva pāyaya ||

ye yajatrā ya īḍyās te te pibantu jihvayā |
madhor agne vaṣaṭkṛti ||

ākīṁ sūryasya rocanād viśvān devām̐ uṣarbudhaḥ |
vipro hoteha vakṣati ||

viśvebhiḥ somyam madhv agna indreṇa vāyunā |
pibā mitrasya dhāmabhiḥ ||

tvaṁ hotā manurhito 'gne yajñeṣu sīdasi |
semaṁ no adhvaraṁ yaja ||

yukṣvā hy aruṣī rathe harito deva rohitaḥ |
tābhir devām̐ ihā vaha ||