Rig Veda · Chapter 1.013

susamiddho na ā vaha devām̐ agne haviṣmate |
hotaḥ pāvaka yakṣi ca ||

madhumantaṁ tanūnapād yajñaṁ deveṣu naḥ kave |
adyā kṛṇuhi vītaye ||

narāśaṁsam iha priyam asmin yajña upa hvaye |
madhujihvaṁ haviṣkṛtam ||

agne sukhatame rathe devām̐ īḻita ā vaha |
asi hotā manurhitaḥ ||

stṛṇīta barhir ānuṣag ghṛtapṛṣṭham manīṣiṇaḥ |
yatrāmṛtasya cakṣaṇam ||

vi śrayantām ṛtāvṛdho dvāro devīr asaścataḥ |
adyā nūnaṁ ca yaṣṭave ||

naktoṣāsā supeśasāsmin yajña upa hvaye |
idaṁ no barhir āsade ||

tā sujihvā upa hvaye hotārā daivyā kavī |
yajñaṁ no yakṣatām imam ||

iḻā sarasvatī mahī tisro devīr mayobhuvaḥ |
barhiḥ sīdantv asridhaḥ ||

iha tvaṣṭāram agriyaṁ viśvarūpam upa hvaye |
asmākam astu kevalaḥ ||

ava sṛjā vanaspate deva devebhyo haviḥ |
pra dātur astu cetanam ||

svāhā yajñaṁ kṛṇotanendrāya yajvano gṛhe |
tatra devām̐ upa hvaye ||