Rig Veda · Chapter 1.012

agniṁ dūtaṁ vṛṇīmahe hotāraṁ viśvavedasam |
asya yajñasya sukratum ||

agnim-agniṁ havīmabhiḥ sadā havanta viśpatim |
havyavāham purupriyam ||

agne devām̐ ihā vaha jajñāno vṛktabarhiṣe |
asi hotā na īḍyaḥ ||

tām̐ uśato vi bodhaya yad agne yāsi dūtyam |
devair ā satsi barhiṣi ||

ghṛtāhavana dīdivaḥ prati ṣma riṣato daha |
agne tvaṁ rakṣasvinaḥ ||

agnināgniḥ sam idhyate kavir gṛhapatir yuvā |
havyavāḍ juhvāsyaḥ ||

kavim agnim upa stuhi satyadharmāṇam adhvare |
devam amīvacātanam ||

yas tvām agne haviṣpatir dūtaṁ deva saparyati |
tasya sma prāvitā bhava ||

yo agniṁ devavītaye haviṣmām̐ āvivāsati |
tasmai pāvaka mṛḻaya ||

sa naḥ pāvaka dīdivo 'gne devām̐ ihā vaha |
upa yajñaṁ haviś ca naḥ ||

sa naḥ stavāna ā bhara gāyatreṇa navīyasā |
rayiṁ vīravatīm iṣam ||

agne śukreṇa śociṣā viśvābhir devahūtibhiḥ |
imaṁ stomaṁ juṣasva naḥ ||