Revākhāṇḍa (revised text) · Chapter 93
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe yamahāsyatīrthamāhātmyavarṇanaṃ nāma dvinavatitamo 'dhyāyaḥ ||
RKV adhyāya 93
śrīmārkaṇḍeya uvāca:
tato gacchettu rājendra kalhoḍītīrthamuttamam /
vikhyātaṃ bhārate loke gaṅgāyāḥ pāpanāśanam
durlabhaṃ manujaiḥ pārtha revātaṭasamāśritam /
prāṇināṃ pāpanāśāya ūṣaraṃ puṣkaraṃ tathā
tattu tīrthamidaṃ puṇyamityevaṃ śūlino vacaḥ /
jāhnavī paśurūpeṇa tatra snānārthamāgatā
atastadviśrutaṃ loke kalhoḍītīrthamuttamam /
trirātraṃ kārayettatra pūrṇimāyāṃ yudhiṣṭhira
rajastamastathā krodhaṃ dambhaṃ mātsaryameva ca /
etāṃstyajati yaḥ pārtha tenāptaṃ mokṣajaṃ phalam
payasā snāpayed devaṃ trisandhyaṃ ca tryahaṃ tathā /
payo gosambhavaṃ sadyaḥ savatsā jīvaputriṇī
kṛtvā tattāmraje pātre kṣaudreṇa caiva yojite /
oṃ namaḥ śrīśivāyeti snānaṃ devasya kārayet
sa yāti tridaśasthānaṃ nākastrībhiḥ samāvṛtaḥ /
yastatra vidhivatsnātvā dānaṃ preteṣu yacchati
śuklāṃ gāṃ dāpayet tatra prīyatāṃ me pitāmahāḥ /
brāhmaṇe śaucasampanne svadāranirate sadā
savatsāṃ vastrasaṃyuktāṃ hiraṇyopari saṃsthitām /
sattvayukto dadad rājañchāmbhavaṃ lokamāpnuyāt
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0