રેવાખાણ્ડ (સંશોધિત પાઠ) · અધ્યાય 93

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે યમહાસ્યતીર્થમાહાત્મ્યવર્ણનં નામ દ્વિનવતિતમો ઽધ્યાયઃ ॥
ર્ક્વ્ અધ્યાય 93
શ્રીમાર્કણ્ડેય ઉવાચ:
તતો ગચ્છેત્તુ રાજેન્દ્ર કલ્હોડીતીર્થમુત્તમમ્ ।
વિખ્યાતં ભારતે લોકે ગઙ્ગાયાઃ પાપનાશનમ્

દુર્લભં મનુજૈઃ પાર્થ રેવાતટસમાશ્રિતમ્ ।
પ્રાણિનાં પાપનાશાય ઊષરં પુષ્કરં તથા

તત્તુ તીર્થમિદં પુણ્યમિત્યેવં શૂલિનો વચઃ ।
જાહ્નવી પશુરૂપેણ તત્ર સ્નાનાર્થમાગતા

અતસ્તદ્વિશ્રુતં લોકે કલ્હોડીતીર્થમુત્તમમ્ ।
ત્રિરાત્રં કારયેત્તત્ર પૂર્ણિમાયાં યુધિષ્ઠિર

રજસ્તમસ્તથા ક્રોધં દમ્ભં માત્સર્યમેવ ચ ।
એતાંસ્ત્યજતિ યઃ પાર્થ તેનાપ્તં મોક્ષજં ફલમ્

પયસા સ્નાપયેદ્ દેવં ત્રિસન્ધ્યં ચ ત્ર્યહં તથા ।
પયો ગોસમ્ભવં સદ્યઃ સવત્સા જીવપુત્રિણી

કૃત્વા તત્તામ્રજે પાત્રે ક્ષૌદ્રેણ ચૈવ યોજિતે ।
ઓં નમઃ શ્રીશિવાયેતિ સ્નાનં દેવસ્ય કારયેત્

સ યાતિ ત્રિદશસ્થાનં નાકસ્ત્રીભિઃ સમાવૃતઃ ।
યસ્તત્ર વિધિવત્સ્નાત્વા દાનં પ્રેતેષુ યચ્છતિ

શુક્લાં ગાં દાપયેત્ તત્ર પ્રીયતાં મે પિતામહાઃ ।
બ્રાહ્મણે શૌચસમ્પન્ને સ્વદારનિરતે સદા

સવત્સાં વસ્ત્રસંયુક્તાં હિરણ્યોપરિ સંસ્થિતામ્ ।
સત્ત્વયુક્તો દદદ્ રાજઞ્છામ્ભવં લોકમાપ્નુયાત્