Revākhāṇḍa (revised text) · Chapter 68
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe luṅkeśvaratīrthamāhātmyavarṇanaṃ nāma saptaṣaṣṭitamo 'dhyāyaḥ ||
RKV adhyāya 68
śrīmārkaṇḍeya uvāca:
dhanadasya tu tattīrthaṃ tato gacched yudhiṣṭhira /
narmadādakṣiṇe kūle sarvapāpakṣayaṃkaram
sarvatīrthaphalaṃ tatra prāpyate nātra saṃśayaḥ /
caitramāsatrayodaśyāṃ śuklapakṣe jitendriyaḥ
upoṣya parayā bhaktyā rātrau kurvīta jāgaram /
pañcāmṛtena rājendra snāpayed dhanadaṃ budhaḥ
dīpaṃ ghṛtena dātavyaṃ gītaṃ vādyaṃ ca kārayet /
prabhāte pūjayed viprān ātmanaḥ śreya icchati
pratigrahasamarthāṃśca vidyāsiddhāntavādinaḥ /
śrautasmārtakriyāyuktān paradāraparāṅmukhān
pūjayedgohiraṇyena vastropānahabhojanaiḥ /
chatraśayyāpradānena sarvapāpakṣayo bhavet
trijanmajanitaṃ pāpaṃ varadasya prabhāvataḥ /
svargadaṃ durvinītānāṃ vinītānāṃ ca mokṣadam
annadaṃ ca daridrāṇāṃ bhavejjanmanijanmani /
kulīnatvaṃ duḥkhahāniḥ svabhāvājāyate nare
vyādhidhvaṃso bhavet teṣāṃ narmadodakasevanāt /
dhanadasya tu yastīrthe vidyādānaṃ prayacchati
sa yāti bhāskare loke sarvavyādhivivarjite /
devadroṇīṃ ca tatraiva svaśaktyā pāṇḍunandana
ye prakurvanti bhūyiṣṭhāṃ revāyā dakṣiṇe taṭe /
te yānti śāṃkare loke sarvaduḥkhavivarjite
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0