Revākhāṇḍa (revised text) · Chapter 69

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe dhanadatīrthamāhātmyavarṇanaṃ nāmāṣṭaṣaṣṭitamo 'dhyāyaḥ ||
RKV adhyāya 69
śrīmārkaṇḍeya uvāca:
tato gacchettu rājendra maṅgaleśvaramuttamam /
sthāpitaṃ bhūmiputreṇa lokānāṃ hitakāmyayā

toṣitaḥ parayā bhaktyā śaṅkaraḥ śaśiśekharaḥ /
caturdaśyāṃ gururdevaḥ pratyakṣo maṅgaleśvaraḥ

brūhi putra varaṃ śubhraṃ taṃ te dāsyāmi maṅgala

maṅgala uvāca:
prasādaṃ kuru me śambho pratijanmani śaṅkara /
tvadaṅgasvedasambhūto grahamadhye vasāmyaham

tvatprasādena īśāna pūjyo 'haṃ sarvadaivataiḥ /
kṛtārtho hyadya saṃjātastava darśanabhāṣaṇāt

sthāne 'smin devadeveśa mama nāmnā maheśvaraḥ /
evaṃ bhavatu te putretyuktvā cāntaradhīyata

maṅgalo 'pi mahātmā vai sthāpayitvā maheśvaram /
ātmayogabalenaiva śūlināpūjayattataḥ

sarvaduḥkhaharaṃ liṅgaṃ nāmnā vai maṅgaleśvaram /
tatra tīrthe tu vai rājanbrāhmaṇānprīṇayetsudhīḥ

sapatnīkān nṛpaśreṣṭha caturthyaṅgārake vrate /
patnībhartārasaṃyuktaṃ vidvāṃsaṃ śrotriyaṃ dvijam

vratānte caiva gaurdhuryaiḥ śivamuddiśya dīyate /
prīyatāṃ me mahādevaḥ sapatnīko vṛṣadhvajaḥ

vastrayugmaṃ pradātavyaṃ lohitaṃ pāṇḍunandana /
dhūrvahau raktavarṇau ca śubhraṃ kṛṣṇaṃ tathaiva ca

chatraṃ śayyāṃ śubhāṃ caiva raktamālyānulepanam /
dātavyaṃ pāṇḍavaśreṣṭha viśuddhenāntarātmanā

caturthyāṃ tu tathāṣṭamyāṃ pakṣayoḥ śuklakṛṣṇayoḥ /
śrāddhaṃ tatraiva kartavyaṃ vittaśāṭhyena varjitaḥ

pretā bhavanti suprītā yugamekaṃ mahīpate /
saputro jāyate martyaḥ pratijanma nṛpottama

tasya tīrthasya bhāvena sarvāṅgaruciro nṛpa /
maṅgalaṃ bhavate vaṃśo nāśubhaṃ vidyate kvacit

bhaktyā yaḥ kīrtayen nityaṃ tasya pāpaṃ vyapohati