રેવાખાણ્ડ (સંશોધિત પાઠ) · અધ્યાય 68

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે લુઙ્કેશ્વરતીર્થમાહાત્મ્યવર્ણનં નામ સપ્તષષ્ટિતમો ઽધ્યાયઃ ॥
ર્ક્વ્ અધ્યાય 68
શ્રીમાર્કણ્ડેય ઉવાચ:
ધનદસ્ય તુ તત્તીર્થં તતો ગચ્છેદ્ યુધિષ્ઠિર ।
નર્મદાદક્ષિણે કૂલે સર્વપાપક્ષયંકરમ્

સર્વતીર્થફલં તત્ર પ્રાપ્યતે નાત્ર સંશયઃ ।
ચૈત્રમાસત્રયોદશ્યાં શુક્લપક્ષે જિતેન્દ્રિયઃ

ઉપોષ્ય પરયા ભક્ત્યા રાત્રૌ કુર્વીત જાગરમ્ ।
પઞ્ચામૃતેન રાજેન્દ્ર સ્નાપયેદ્ ધનદં બુધઃ

દીપં ઘૃતેન દાતવ્યં ગીતં વાદ્યં ચ કારયેત્ ।
પ્રભાતે પૂજયેદ્ વિપ્રાન્ આત્મનઃ શ્રેય ઇચ્છતિ

પ્રતિગ્રહસમર્થાંશ્ચ વિદ્યાસિદ્ધાન્તવાદિનઃ ।
શ્રૌતસ્માર્તક્રિયાયુક્તાન્ પરદારપરાઙ્મુખાન્

પૂજયેદ્ગોહિરણ્યેન વસ્ત્રોપાનહભોજનૈઃ ।
છત્રશય્યાપ્રદાનેન સર્વપાપક્ષયો ભવેત્

ત્રિજન્મજનિતં પાપં વરદસ્ય પ્રભાવતઃ ।
સ્વર્ગદં દુર્વિનીતાનાં વિનીતાનાં ચ મોક્ષદમ્

અન્નદં ચ દરિદ્રાણાં ભવેજ્જન્મનિજન્મનિ ।
કુલીનત્વં દુઃખહાનિઃ સ્વભાવાજાયતે નરે

વ્યાધિધ્વંસો ભવેત્ તેષાં નર્મદોદકસેવનાત્ ।
ધનદસ્ય તુ યસ્તીર્થે વિદ્યાદાનં પ્રયચ્છતિ

સ યાતિ ભાસ્કરે લોકે સર્વવ્યાધિવિવર્જિતે ।
દેવદ્રોણીં ચ તત્રૈવ સ્વશક્ત્યા પાણ્ડુનન્દન

યે પ્રકુર્વન્તિ ભૂયિષ્ઠાં રેવાયા દક્ષિણે તટે ।
તે યાન્તિ શાંકરે લોકે સર્વદુઃખવિવર્જિતે