Scripture Library

Revākhāṇḍa (revised text) · Chapter 40

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śrīnarmadāmāhātmye kapilātīrthamāhātmyavarṇanaṃ nāmaikonacatvāriṃśo 'dhyāyaḥ ||
RKV adhyāya 40
śrīmārkaṇḍeya uvāca:
tato gacchettu rājendra karañjeśvaram uttamam /
yatra siddho mahābhāgo daityo lokeṣu viśrutaḥ

40.2

yudhiṣṭhira uvāca:
yo 'sau siddho mahābhāga tatra tīrthe mahātapāḥ /
kasya putraḥ kathaṃ siddhaḥ kasminkāle vada dvija

40.3

mārkaṇḍeya uvāca:
purā kṛtayuge rājanmānaso brahmaṇaḥ sutaḥ /
vedavedāṅgatattvajño marīcirnāma nāmataḥ

40.4

tasyāpi tapaso rāśeḥ kālena mahatānagha /
putro 'tha mānaso jātaḥ sākṣād brahmeva cāparaḥ

40.5

kṣamā damo dayā dānaṃ satyaṃ śaucam athārjavam /
marīceśca guṇā hyete santi tasya ca bhārata

40.6

evaṃ guṇagaṇākīrṇaṃ kaśyapaṃ dvijasattamam /
jñātvā prajāpatir dakṣo bhāryārthe svasutāṃ dadau

40.7

aditirditirdanuścaiva tathāpyevaṃ daśāparāḥ /
yāsāṃ putrāśca saṃjātāḥ pautrāśca bharatarṣabha

40.8

aditirjanayāmāsa putrān indrapurogamān /
jātāstasya mahābāho kaśyapasya prajāpateḥ

40.9

yaistu lokatrayaṃ vyāptaṃ sthāvaraṃ jaṅgamaṃ mahat /
tathānyasya mahābhāgo danoḥ putro vyajāyata

40.10

sarvalakṣaṇasampannaḥ karañjo nāma nāmataḥ /
bāla eva mahābhāga cacāra sa mahattapaḥ

40.11

narmadātaṭamāśritya cātighoram anuttamam /
divyaṃ varṣasahasraṃ ca kṛcchracāndrāyaṇaṃ nṛpa

40.12

śākamūlaphalāhāraḥ snānahomaparāyaṇaḥ /
tatastuṣṭo mahādeva umayā sahitaḥ kila

40.13

vareṇa chandayāmāsa tripurāntakaraḥ prabhuḥ /
bhoḥ karañja mahāsattva parituṣṭo 'smi te 'nagha

40.14

varaṃ vṛṇīṣva te dadmi hyamaratvamṛte mama

40.15

karañja uvāca:
yadi tuṣṭo mahādeva yadi deyo varo mama /
tarhi putrāśca pautrāśca santu me dharmavatsalāḥ

40.16

tathetyuktvā mahādeva umayā sahitas tadā /
vṛṣārūḍho gaṇaiḥ sārddhaṃ tatraivāntaradhīyata

40.17

gate cādarśanaṃ deve so 'pi daityo mudānvitaḥ /
svanāmnātra mahādevaṃ sthāpayitvā yayau gṛham

40.18

tadāprabhṛti tattīrthaṃ sarvatīrtheṣvanuttamam /
snānamātrānarastatra mucyate sarvapātakaiḥ

40.19

tatra tīrthe tu yaḥ snātvā tarpayet pitṛdevatāḥ /
so 'gniṣṭomasya yajñasya phalaṃ prāpnoty asaṃśayam

40.20

anāśakaṃ tu yaḥ kuryāt tasmiṃstīrthe narādhipa /
anivartyā gatistasya rudralokaṃ sa gacchati

40.21

athavāgnijale prāṇānyastyajed dharmanandana /
ayutadvitayaṃ vaste varṣāṇāṃ śivamandire

40.22

tataścaiva kṣaye jāte jāyate vimale kule /
vedavedāṅgatattvajñaḥ sarvaśāstraviśāradaḥ

40.23

rājā vā rājatulyo vā jīvecca śaradaḥ śatam /
putrapautrasamopetaḥ sarvavyādhivivarjitaḥ

40.24

evaṃ te sarvamākhyātaṃ pṛṣṭaṃ yadyattvayānagha /
tīrthasya tu phalaṃ tasya snānadāneṣu bhārata

40.25

etatpuṇyaṃ pāpaharaṃ dhanyaṃ duḥsvapnanāśanam /
paṭhatāṃ śṛṇvatāṃ caiva tīrthamāhātmyamuttamam

40.26

yastu śrāvayate śrāddhe paṭhet pitṛparāyaṇaḥ /
akṣayaṃ jāyate puṇyamityevaṃ śaṅkaro 'bravīt

Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0