Revākhāṇḍa (revised text) · Chapter 41

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmye karañjeśvaratīrthamāhātmyavarṇanaṃ nāma catvāriṃśo 'dhyāyaḥ ||
RKV adhyāya 41
śrīmārkaṇḍeya uvāca:
tato gacchecca rājendra kuṇḍaleśvaramuttamam /
yatra siddho mahāyakṣaḥ kuṇḍadhāro nṛpottama

tapaḥ kṛtvā suvipulaṃ surāsurabhayaṃkaram /
paulastyamandire caiva cikrīḍa nṛpasattama

yudhiṣṭhira uvāca:
kasminyuge samutpannaḥ kasya putro mahāmatiḥ /
tapastaptvā suvipulaṃ toṣito yena śaṅkaraḥ

etadvistaratastāta kathayasva mamānagha /
śṛṇvataśca na tṛptir me kathāmṛtamanuttamam

śrīmārkaṇḍeya uvāca:
tretāyuge brahmasamaḥ paulastyonāma viśravāḥ /
tapaḥ kṛtvā suvipulaṃ bharadvājasutodbhavaḥ

putraṃ pautragaṇair yuktaṃ patnyā bhaktyā sutoṣitaḥ /
dhanadaṃ janayāmāsa sarvalakṣaṇalakṣitam

jātamātraṃ tu taṃ jñātvā brahmā lokapitāmahaḥ /
cakāra nāma suprīta ṛṣidevasamanvitaḥ

yasmād viśravaso jāto mama pautratvam āgataḥ /
tasmād vaiśravaṇo nāma tava dattaṃ mayānagha

tathā tvaṃ sarvadevānāṃ dhanagoptā bhaviṣyasi /
caturtho lokapālānāmakṣayaścāvyayo bhuvi

tasya bhāryā mahārāja īśvarīti ca viśrutā /
yakṣo yakṣādhipaḥ śreṣṭhastasya kuṇḍo 'bhavat sutaḥ

sa ca rūpaṃ paraṃ prāpya mātāpitroranujñayā /
tapaś cacāra vipulaṃ narmadātaṭamāśritaḥ

grīṣme pañcāgnisaṃtapto varṣāsu sthaṇḍileśayaḥ /
hemante jalamadhyastho vāyubhakṣaḥ śataṃ samāḥ

evaṃ varṣaśate pūrṇe ekāṅguṣṭhe 'bhavan nṛpa /
asthibhūtaḥ paraṃ tāta ūrdhvabāhustataḥ param

atapacca ghṛtaśvāsaḥ kuṇḍalo bharatarṣabha /
caturthe varṣaśatake tutoṣa vṛṣavāhanaḥ

varaṃ vṛṇīṣva bho vatsa yatte manasi rocate /
dadāmi te na sandehastapasā toṣito hyaham

kuṇḍala uvāca:
yakṣādhipaprasādena tasyaivānucaraḥ pure /
vicarāmi yathākāmamavadhyaḥ sarvaśatruṣu

tathetyuktvā mahādevaḥ sarvalokanamaskṛtaḥ /
jagāmākāśamāviśya kailāsaṃ dharaṇīdharam

gate cādarśanaṃ deve so 'pi yakṣo mudānvitaḥ /
sthāpayāmāsa deveśaṃ kuṇḍaleśvaramuttamam

alaṃkṛtvā jagannāthaṃ puṣpadhūpānulepanaiḥ /
vimānaiścāmaraiśchatrais tathā vai liṅgapūraṇaiḥ

tarpayitvā dvijānsamyagannapānādibhūṣaṇaiḥ /
prīṇayitvā mahādevaṃ tataḥ svabhavanaṃ yayau

tadāprabhṛti tattīrthaṃ triṣu lokeṣu viśrutam /
uttamaṃ paramaṃ puṇyaṃ kuṇḍaleśvaranāmataḥ

tatra tīrthe tu yaḥ kaścid upavāsaparāyaṇaḥ /
arcayed devamīśānaṃ sarvapāpaiḥ pramucyate

suvarṇaṃ rajataṃ vāpi maṇiṃ mauktikameva ca /
dadyād bhojyaṃ brāhmaṇebhyaḥ sa sukhī modate divi

tatra tīrthe tu yaḥ snātvā ṛgyajuḥsāmago 'pi vā /
ṛcamekāṃ japitvā tu sakalaṃ phalamaśnute

gāṃ prayacchati viprebhyastatphalaṃ śṛṇu pāṇḍava /
yāvanti tasyā romāṇi tatprasūtikuleṣu ca

tāvadvarṣasahasrāṇi svargaloke mahīyate /
svarge vāso bhavettasya putrapautraiḥ samanvitaḥ

tāvanti varṣāṇi mahānubhāvaḥ svarge vaset putrapautraiśca sārddham /
tatrānnado yāti maheśalokamasaṃkhyavarṣāṇi na saṃśayo 'tra

sa vai sukhī modate svargaloke gandharvasiddhāpsaraḥsampragīte /
evaṃ tu te dharmasuta prabhāvastīrthasya sarvaḥ kathitaśca pārtha

śrutvā stuvanmucyate sarvapāpaiḥ punastrilokīm iha tatprabhāvāt