Revākhāṇḍa (revised text) · Chapter 30
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmye kāverīsaṅgamamāhātmyavarṇanaṃ nāmaikonatriṃśo 'dhyāyaḥ ||
RKV adhyāya 30
śrīmārkaṇḍeya uvāca:
narmadottarakūle tu dārutīrthamanuttamam /
yatra siddho mahābhāga tapastaptvā dvijottamaḥ
yudhiṣṭhira uvāca:
ko 'sau dvijavaraśreṣṭhaḥ siddhastatra mahāmune /
dāruketi sutaḥ kasya etanme vaktum arhasi
śrīmārkaṇḍeya uvāca:
bhārgave vipule vaṃśe dhīmato devaśārmaṇaḥ /
dārurnāma mahābhāgo vedavedāṅgapāragaḥ
brahmacārī gṛhasthaśca vānaprastho vidhikramāt /
yatidharmavidhānena cacāra vipulatapaḥ
dhyāyanvai sa mahādevaṃ nirāhāro yudhiṣṭhira /
uvāsa tīrthe tasmin vai yāvatprāṇaparikṣayam
tasya nāmnā tu tattīrthaṃ triṣu lokeṣu viśrutam /
tatra snātvā vidhānena arcayetpitṛdevatāḥ
satyavādī jitakrodhaḥ sarvabhūtahite rataḥ /
sarvānkāmān avāpnoti rājannatraiva savarthā
yaḥ kuryād upavāsaṃ ca satyaśaucaparāyaṇaḥ sautrāmaṇiphalaṃ cāsya sambhavatyavicāritam
ṛgvedajāpī ṛgvedī sāma vā sāmapāragaḥ /
yajurvedī yajurjaptvā labhate phalam uttamam
prāṇāṃs tyajati yo martyas tasmiṃstīrthe vidhānataḥ /
anivartikā gatistasya ityevaṃ śaṅkaro 'bravīt
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0