Revākhāṇḍa (revised text) · Chapter 31
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe dārutīrthamāhātmyavarṇanaṃ nāma triṃśo 'dhyāyaḥ ||
RKV adhyāya 31
śrīmārkaṇḍeya uvāca:
tato gacchecca rājendra tīrthaṃ trailokyaviśrutam /
brahmāvartamiti khyātaṃ sarvapāpapraṇāśanam
tatra saṃnihito brahmā nityasevī yudhiṣṭhira /
ūrdhvabāhurnirālambacakāra bhramaṇaṃ sadā
ekāhāravaśe 'tiṣṭhaddvādaśābdaṃ mahāvratī /
atra tīrthe vidhānena cintayan vai maheśvaram
tena tatpuṇyamākhyātaṃ brahmāvartamiti prabho /
tatra snātvā vidhānena tarpayet pitṛdevatāḥ
arcayeddevamīśānaṃ viṣṇuṃ vā parameśvaram /
yatphalaṃ sarvayajñānāṃ vidhivaddakṣiṇāvatām
tatphalaṃ samavāpnoti tattīrthasya prabhāvataḥ /
yasmiṃstīrthe tu yo devo dānavo vā dvijo 'tha vā
siddhastenaiva tannāmnā khyātaṃ loke mahacca tat /
na jalaṃ na sthalaṃ nāma kṣetraṃ vā hyūṣarāṇi ca
pavitratvaṃ labhantyete pauruṣeṇa vinā nṛṇām /
sāmarthyānniścayāddhairyātsidhyanti puruṣā nṛpa
pramādāt tasya lobhena patanti narake dhruvam
saṃnirudhyendriyagrāmaṃ yatra yatra vasen muniḥ /
tatra tatra kurukṣetraṃ naimiṣaṃ puṣkarāṇi ca
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0