Revākhāṇḍa (revised text) · Chapter 3

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe revāmāhātmyavarṇanaṃnāma dvitīyo 'dhyāyaḥ ||
RKV adhyāya 3
yudhiṣṭhira uvāca:
saptakalpakṣayā ghorāstvayā dṛṣṭā mahāmune /
na cāpīhāsti bhagavandīrghāyuriha kaścana

tvayā hyekārṇave suptaḥ padmanābhaḥ surārihā /
dṛṣṭaḥ sahasracaraṇaḥ sahasranayanodaraḥ

tvaṃ kilānugrahāt tasya dahyamāne carācare /
na kṣayaṃ samanuprāpto varadānānmahātmanaḥ

kiṃ tvayāścaryabhūtaṃ hi dṛṣṭaṃ ca bhramatānagha /
etadācakṣva bhagavanparaṃ kautūhalaṃ hi me

samprāpte ca mahāghore yugasyānte mahākṣaye /
anāvṛṣṭihate loke purā varṣaśatādhike

auṣadhīnāṃ kṣaye ghore devadānavavarjite /
nirvīrye nirvaṣaṭkāre kalinā dūṣite bhṛśam

saritsarastaḍāgeṣu palvalopavaneṣu ca /
saṃśuṣkeṣu tadā brahmannirākāre yugakṣaye

janaṃ prāpte maharloke brahmakṣatraviśādayaḥ /
ṛṣayaśca mahātmāno divyatejaḥsamanvitāḥ

sthitāni kāni bhūtāni gatānyeva mahāmune /
etatsarvaṃ mahābhāga kathayasva pṛthakpṛthak

bhūtāni kāni viprendra kathaṃ siddhim avāpnuyāt /
brahmaviṣṇvindrarudrāṇāṃ kāle prāpte sudāruṇe

evamuktas tataḥ so 'tha dharmarājena dhīmatā /
mārkaṇḍaḥ pratyuvācedamṛṣisaṃghaiḥ samāvṛtaḥ

śrīmārkaṇḍeya uvāca:
śṛṇvantu ṛṣayaḥ sarve tvayā saha nareśvara /
mahatpurāṇaṃ pūrvoktaṃ śaṃbhunā vāyudaivate

vāyoḥ sakāśātskandena śrutametatpurātanam /
vasiṣṭhaḥ śrutavāṃstasmāt parāśarastataḥ param

tasmācca jātūkarṇyena tasmāccaiva maharṣibhiḥ /
evaṃ paramparāproktaṃ śatasaṃkhyair dvijottamaiḥ

saṃhitā śatasāhasrī puroktā śaṃbhunā kila /
āloḍya sarvaśāstrāṇi vadārthaṃ tattvataḥ purā

yugarūpeṇa sā paścāc caturdhā viniyojitā /
madaprajñānusāreṇa narāṇāṃ tu maharṣibhiḥ

ārādhya paśubhartāraṃ mayā pūrvaṃ maheśvaram /
purāṇaṃ śrutametaddhi tatte vakṣyāmyaśeṣataḥ

yacchrutvā mucyate jantuḥ sarvapāpairnareśvara /
mānasaiḥ karmajaiścaiva saptajanmasu saṃcitaiḥ

saptakalpakṣayā ghorā mayā dṛṣṭāḥ punaḥpunaḥ /
prasādāddevadevasya viṣṇośca parameṣṭhinaḥ

dvādaśādityanirdagdhe jagatyekārṇavīkṛte /
śrānto 'haṃ vibhramaṃs tatra taranbāhubhir arṇavam

athāhaṃ salile rājannādityasamarūpiṇam /
purā puruṣamadrākṣamanādinidhanaṃ prabhum

śṛṅgaṃ caivādrirājasya bhāsayantaṃ diśo daśa /
dvitīyo 'nyo manurdṛṣṭaḥ putrapautrasamanvitaḥ

agādhe bhramate so 'pi tamobhūte mahārṇave /
aviśramanmuhūrtaṃ tu cakrārūḍha iva bhraman

athāhaṃ bhayādudvignastaranbāhubhir arṇavam /
tatrastho'haṃ mahāmatsyam apaśyaṃ madasaṃyutam

tato 'bravītsa māṃ dṛṣṭvā ehyehīti ca bhārata /
paraṃ pradhānaḥ sarveṣāṃ matsyarūpo maheśvaraḥ

tato 'haṃ tvarayā gatvā tanmukhe manujeśvara /
suśrānto vigatajñānaḥ paraṃ nirvedamāgataḥ

tato 'drākṣaṃ samudrānte mahadāvartasaṃkulām /
udyattaraṃgasalilāṃ phenapuñjāṭṭahāsinīm

nadīṃ kāmagamāṃ puṇyāṃ jhaṣamīnasamākulām /
nadyāstasyāstu madhyasthā pramadā kāmarūpiṇī

nīlotpaladalaśyāmā mahatprakṣobhavāhinī /
divyahāṭakacitrāṅgī kanakojjvalaśobhitā

dvābhyāṃ saṃgṛhya jānubhyāṃ mahatpotaṃ vyavasthitā /
tāṃ manuḥ pratyuvācedaṃ kā tvaṃ divyavarāṅgane

tiṣṭhase kena kāryeṇa tvamatra surasundari /
surāsuragaṇe naṣṭe bhramase līlayārṇave

saritaḥ sāgarāḥ śailāḥ kṣayaṃ prāptā hyanekaśaḥ /
tvamekā tu kathaṃ sādhvi tiṣṭhase kāraṇaṃ mahat /
śrotumicchāmyahaṃ devi kathayasva hyaśeṣataḥ

abalovāca:
īśvarāṅgasamudbhūtā hyamṛtānāma viśrutā /
saritpāpaharā puṇyā māmāśritya bhayaṃ kutaḥ

sāhaṃ potamimaṃ tubhyaṃ gṛhītvā hyāgatā dvija /
na hyasya potasya kṣayo yatra tiṣṭhati śaṃkaraḥ

tasyās tad vacanaṃ śrutvā vismayotphullalocanaḥ /
manunā saha rājendra potārūḍho hyahaṃ tadā

kṛtāñjalipuṭo bhūtvā praṇamya śirasā vibhum /
vyāpinaṃ parameśānamastauṣamabhayapradam

sadyojātāya devāya vāmadevāya vai namaḥ /
bhave bhave namastubhyaṃ bhaktigamyāya te namaḥ

bhūrbhuvāya namastubhyaṃ rāmajyeṣṭhāya vai namaḥ /
namaste bhadrakālāya kalirūpāya vai namaḥ

acintyāvyaktarūpāya mahādevāya dhāmane /
vidmahe devadevāya tanno rudra namonamaḥ

jagatsṛṣṭivināśānāṃ kāraṇāya namonamaḥ /
evaṃ stuto mahādevaḥ pūrvaṃ sṛṣṭayā mayānagha

prasanno māvadat paścādvaraṃ varaya suvrata