Revākhāṇḍa (revised text) · Chapter 27

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmye madhūkatṛtīyāvratavidhānamāhātmyavarṇanaṃ nāma ṣaḍviṃśo 'dhyāyaḥ ||
RKV adhyāya 27
śrīmārkaṇḍeya uvāca:
nāradasya vacaḥ śrutvā rājñī vacanam abravīt /
prasādaṃ kuru viprendra gṛhṇa dānaṃ yathepsitam

suvarṇamaṇiratnāni vastrāṇi vividhāni ca /
tatte dārayāmi viprendra yaccānyad api durlabham

rājñyāstu vacanaṃ śrutvā nārado vākyam abravīt /
anyeṣāṃ dīyatāṃ bhadre ye dvijāḥ kṣīṇavṛttayaḥ

vayaṃ tu sarvasampannā bhaktigrāhyāḥ sadaiva hi /
ityuktā sā tadā rājñī vedavedāṅgapāragān

āhūya brāhmaṇān niḥsvāndātuṃ samupacakrame /
yat kiṃcinnāradenoktaṃ dānasaubhāgyavardhanam

tena dānena me nityaṃ prīyetāṃ hariśaṅkarau /
tato rājñī ca sā prāha nāradaṃ munipuṃgavam

rājñyuvāca:
dānaṃ dattaṃ tvayoktaṃ yadbhartṛkarmaparaṃ hi tat /
ājanmajanma me bhartā bhavedbāṇo dvijottama

nānyo hi daivataṃ tāta muktvā bāṇaṃ dvijottama /
tena satyena me bhartā jīvecca śaradāṃ śatam

nānyo dharmo bhavet strīṇāṃ daivataṃ hi patiryathā /
tathāpi tava vākyena dānaṃ dattaṃ yathāvidhi

svakaṃ karma kariṣyāmo bhartāraṃ prati mānada /
brahmarṣe gaccha cedānīṃ tvamāśīrvādaḥ pradīyatām

tatheti tāmanujñāpya nārado nṛpasattama /
sarvāsāṃ mānasaṃ hṛtvā anyataḥ kṛtamānasaḥ

jagāmādarśanaṃ vipraḥ pūjyamānastu khecaraiḥ /
tato gatamanaskāstā bhartāraṃ prati bhārata

vivarṇā niṣprabhā jātā nāradena vimohitāḥ