Revākhāṇḍa (revised text) · Chapter 229

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe parārthatīrthayātrāphalakathanaṃ nāmāṣṭaviṃśatyadhikadviśatatamo 'dhyāyaḥ ||
RKV adhyāya 229
śrīmārkaṇḍeya uvāca:
evaṃ te kathitaṃ rājanpurāṇaṃ dharmasaṃhitam /
śivaprītyā yathā proktaṃ vāyunā devasaṃsadi

ṣaṣṭitīrthasahasrāṇi ṣaṣṭikoṭistathaiva ca /
ādimadhyāvasāneṣu narmadāyāṃ pade pade

mayā dvādaśasāhasrī saṃhitā yā śrutā purā /
devadevasya gadataḥ sāmprataṃ kathitā tava

pṛṣṭastvayāhaṃ bhūpāla parvate 'marakaṇṭake /
sthitaḥ saṃkṣepataḥ sarvaṃ mayā tatkathitaṃ tava

narmadācaritaṃ puṇyaṃ śṛṇu tasyāsti yatphalam /
yatphalaṃ sarvavedaiḥ syāt saṣaḍaṅgapadakramaiḥ

paṭhitaiśca śrutair vāpi tasmād bahutaraṃ bhavet /
satrayājī phalaṃ yatra labhate dvādaśābdikam

carite tu śrute devyā labhate tādṛśaṃ phalam /
sarvatīrtheṣu yatpuṇyaṃ snātvā sāgaramāditaḥ

sakṛtsnātvā tathā śrutvā narmadāyāṃ phalaṃ hi tat /
ādimadhyāvasānena narmadācaritaṃ śubham

yaḥ śṛṇoti naro bhaktyā tasya puṇyaphalaṃ śṛṇu /
sa prāpya śivasaṃsthānaṃ rudrakanyāsamāvṛtaḥ

rudrasyānucaro bhūtvā tenaiva saha modate /
etad dharmamupākhyānaṃ sarvaśāstreṣu sattamam

deśe vā maṇḍale vāpi vā grāme nagare 'pi vā /
gṛhe vā tiṣṭhate yasya cāturvarṇyasya bhārata

sa brahmā sa śivaḥ sākṣātsa ca devo janārdanaḥ /
trividhaṃ kāraṇaṃ loke dharmapanthānamuttamam

devatānāṃ guruṃ śāstraṃ paramaṃ siddhikāraṇam /
śrutveśvaramukhātpārtha mayāpi tava kīrtitam

dakṣiṇe cottare kūle yāni tīrthāni kānicit /
pradhānataḥ supuṇyāni kathitāni viśeṣataḥ

sparśanād darśanāt teṣāṃ kīrtanācchravaṇāt tathā /
mucyate sarvapāpebhyo rudralokaṃ sa gacchati

idaṃ yaḥ śṛṇuyān nityaṃ purāṇaṃ śivabhāṣitam /
brāhmaṇo vedavidyāvān kṣatriyo vijayī bhavet

dhanabhāgī bhaved vaiśyaḥ śūdro vai dharmabhāgbhavet /
saubhāgyaṃ santatiṃ svargaṃ nārī śrutvāpnuyāddhanam

brahmaghnaśca surāpaśca steyī ca gurutalpagaḥ /
māhātmyaṃ narmadāyāstu śrutvā pāpabahiṣkṛtāḥ

pāpabhedī kṛtaghnaśca svāmiviśvāsaghātakaḥ /
goghnaśca garadaścaiva kanyāvikrayakārakaḥ

ete śrutvaiva pāpebhyo mucyante nātra saṃśayaḥ /
ye punarbhāvitātmānaḥ śṛṇvanti satataṃ nṛpa

pūjayanta idaṃ devāḥ pūjitā guravaśca taiḥ /
narmadā pūjitā tena bhagavāṃśca maheśvaraḥ

tasmātsarvaprayatnena gandhapuṣpavibhūṣaṇaiḥ /
pūjitaṃ parayā bhaktyā śāstrametatphalapradam

lekhāpayitvā sakalaṃ narmadācaritaṃ śubham /
uttamaṃ sarvaśāstrebhyo yo dadāti dvijanmane

narmadāsarvatīrtheṣu snāne dāne ca yatphalam /
tatphalaṃ samavāpnoti sa naro nātra saṃśayaḥ

etatpurāṇaṃ rudroktaṃ mahāpuṇyaphalapradam /
svargadaṃ putradaṃ dhanyaṃ yaśasyaṃ kīrtivardhanam

sarvapāpaharaṃ pārtha duḥkhaduḥsvapnanāśanam /
paṭhatāṃ śṛṇvatāṃ rājan sarvakāmārthasiddhidam

śāntirastu śivaṃ cāstu lokāḥ santu nirāmayāḥ /
gobrāhmaṇebhyaḥ svastyastu dharmaṃ dharmātmajāśrayaḥ

narakāntakarī revā satīrthā viśvapāvanī /
narmadā dharmadā cāstu śarmadā pārtha te sadā