Revākhāṇḍa (revised text) · Chapter 200

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe āśvinatīrthamāhātmyavarṇanaṃ nāmaikonadviśatatamo 'dhyāyaḥ ||
RKV adhyāya 200
śrīmārkaṇḍeya uvāca:
tasyaivānantaraṃ pārtha sāvitrītīrthamuttamam /
yatra siddhā mahābhāgā sāvitrī vedamātṛkā

yudhiṣṭhira uvāca:
sāvitrī kā dvijaśreṣṭha kathaṃ vārādhyate budhaiḥ /
prasannā vā varaṃ kaṃ ca dadāti kathayasva me

śrīmārkaṇḍeya uvāca:
padmā padmāsanasthenādhiṣṭhitā padmayoginī /
sāvitratejaḥsadṛśī sāvitrī tena cocyate

padmānanā padmavarṇā padmapatranibhekṣaṇā /
dhyātavyā brāhmaṇairnityaṃ kṣatravaiśyair yathāvidhi

brahmahatyābhayātsā hi na tu śūdraiḥ kadācana /
uccāraṇād dhāraṇād vā narake patati dhruvam

vedoccāraṇamātreṇa kṣatriyair dharmapālakaiḥ /
jihvāchedo 'sya kartavyaḥ śūdrasyeti viniścayaḥ

bālā bālendusadṛśī raktavastrānulepanā /
uṣaḥkāle tu dhyātavyā sandhyā sandhāna uttame

uttuṅgapīvarakucā sumukhī śubhadarśanā /
sarvābharaṇasampannā śvetamālyānulepanā

śvetavastraparicchannā śvetayajñopavītinī /
madhyāhnasandhyā dhyātavyā taruṇā bhuktimuktidā

pradoṣe tu punaḥ pārtha śvetā pāṇḍuramūrdhajā /
sumṛtā tu durgakāntāre mātṛvatparirakṣati

viśeṣeṇa tu rājendra sāvitrītīrthamuttamam /
snātvācamya vidhānena manovākkāyakarmabhiḥ

prāṇāyāmair dahed doṣān saptajanmārjitānbahūn /
āpohiṣṭheti mantreṇa prokṣayedātmanastanum

navaṣaṭ ca tathā tisrastatra tīrthe nṛpottama /
āpohiṣṭheti trirāvṛtya pratigrāhair na lipyate

aghamarṣaṇaṃ tryṛcaṃ toyaṃ yathāvedam athāpi vā /
upapāpair na lipyeta padmapatramivāmbhasā

tryāpaṃ hi kurute vipra ullekhatrayam ācaret /
caturthaṃ kārayed yas tu brahmahatyāṃ vyapohati

drupadākhyaśca yo mantro vede vājasaneyake /
antarjale sakṛjjaptaḥ sarvapāpakṣayaṃkaraḥ

udutyam iti mantreṇa pūjayitvā divākaram /
gāyatrīṃ ca japed devīṃ pavitrāṃ vedamātaram

gāyatrīṃ tu japed devīṃ yaḥ sandhyānantaraṃ dvijaḥ /
sarvapāpavinirmukto brahmalokaṃ sa gacchati

daśabhirjanmabhirlabdhaṃ śatena tu purākṛtam /
triyugaṃ tu sahasreṇa gāyatrī hanti kilbiṣam

gāyatrīsāramātro 'pi varaṃ vipraḥ suyantritaḥ /
nāyantritaścaturvedī sarvāśī sarvavikrayī

sandhyāhīno 'śucir nityamanarhaḥ sarvakarmasu /
yadanyat kurute kiṃcinna tasya phalabhāg bhavet

sandhyāṃ nopāsate yastu brāhmaṇo mandabuddhimān /
sa jīvanneva śūdraḥ syān mṛtaḥ śvā samprajāyate

sāvitrītīrthamāsādya sāvitrīṃ yo japeddvijaḥ /
traividyaṃ tu phalaṃ tasya jāyate nātra saṃśayaḥ

pitḥnuddiśya yaḥ snātvā piṇḍanirvapaṇaṃ nṛpa /
kurute dvādaśābdāni tṛpyanti tatpitāmahāḥ

sāvitrītīrthamāsādya yaḥ kuryāt prāṇasaṃkṣayam /
brahmalokaṃ vaset tāvad yāvad ābhūtasamplavam

pūrṇe caiva tataḥ kāla iha mānuṣyatāṃ gataḥ /
caturvedo dvijo rājañjāyate vimale kule

dhanadhānyacayopetaḥ putrapautrasamanvitaḥ /
vyādhiśokavinirmukto jīvecca śaradāṃ śatam