Revākhāṇḍa (revised text) · Chapter 199
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śūleśvaratīrthamāhātmyavarṇanaṃ nāmāṣṭanavatyuttaraśatatamo 'dhyāyaḥ ||
RKV adhyāya 199
śrīmārkaṇḍeya uvāca:
tasyaivānantaraṃ rājannāśvinaṃ tīrthamuttamam /
kāmikaṃ sarvatīrthānāṃ prāṇināṃ siddhidāyakam
tatra tīrthe 'śvinau devau surūpau bhiṣajāṃ varau /
tapaḥ kṛtvā suvipulaṃ saṃjātau yajñabhāginau
saṃmatau sarvadevānāmādityatanayāvubhau /
nāsatyau sattvaṃ pannau sarvaduḥkhaghnasattamau
yudhiṣṭhira uvāca:
ādityasya sutau tāta nāsatyau yena hetunā /
saṃjātau śrotum icchāmi nirṇayaṃ paramaṃ dvija
mārkaṇḍeya uvāca:
purāṇe bhāskare tāta etadvistarato mayā /
saṃśrutaṃ devadevasya mārtaṇḍasya mahātmanaḥ
tatte saṃkṣepataḥ sarvaṃ bhaktiyuktasya bhārata /
kathayāmi na sandeho vṛddhabhāvena karśitaḥ
atitejoraverdṛṣṭvā rājñī devī narottama /
cacāra merukāntāre vaḍavā tapa ulbaṇam
tataḥ katipayāhasya kālasya bhagavānraviḥ /
dṛṣṭvā tu rūpamutsṛjya paramaṃ teja ujjvalam
manobhavavaśībhūto hayo bhūtvā laghukramaḥ /
visphurantī yathāprāṇaṃ dhāvamānā itastataḥ
heṣamāṇaḥ svareṇāsau maithunāyopacakrame /
sammukhī tu tato devī nivṛttā laghuvikramā
yathā tathā nāsikāyāṃ praviṣṭaṃ bījamuttamam /
tato nāsāgate bīje saṃjāto garbha uttamaḥ
jātau yataḥ sutau pārtha nāsatyau viśrutau tataḥ /
susamau suvibhaktāṅgau bimbādbimbamivodyatau
adhikau sarvadevānāṃ rūpaiś caryasamanvitau /
narmadātaṭamāśritya bhṛgukacche gatāvubhau /
parāṃ siddhimanuprāptau tapaḥ kṛtvā suduścaram
tatra tīrthe tu yaḥ snātvā tarpayet pitṛdevatāḥ /
surūpaḥ subhagaḥ pārtha jāyate yatra tatra ca
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0