Revākhāṇḍa (revised text) · Chapter 197
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe haṃsatīrthamāhātmyavarṇanaṃ nāma ṣaṇṇavatyuttaraśatatamo 'dhyāyaḥ ||
RKV adhyāya 197
śrīmārkaṇḍeya uvāca:
tasyaivānantaraṃ gacchet sūryatīrtham anuttamam /
mūlasthānamiti khyātaṃ padmajasthāpitaṃ śubham
mūlaśrīpatinā devī proktā sthāpaya bhāskaram /
śrutvā devoditaṃ devī sthāpayāmāsa bhāskaram
procyate narmadātīre mūlasthānākhyabhāskaraḥ
tatra tīrthe naro yastu snātvā niyatamānasaḥ /
saṃtarpya pitṛdevāṃśca piṇḍena salilena ca
mūlasthānaṃ tataḥ paśyet sa gacchet paramāṃ gatim /
guhyādguhyatarastatra viśeṣastu śruto mayā
samāgame munīnāṃ tu śaṅkarācchaśiśekharāt /
sadā vai śuklasaptamyāṃ mūlamādityavāsaraḥ
tadā revājalaṃ gatvā snātvā saṃtarpya devatāḥ /
pitḥṃśca bharataśreṣṭha dattvā dānaṃ svaśaktitaḥ
karavīrais tato gatvā raktacandanavāriṇā /
saṃsthāpya bhāskaraṃ bhaktyā sampūjya ca yathāvidhi
tataḥ sāgurukair dhūpaiḥ kundaraiśca viśeṣataḥ /
dhūpayed devadeveśaṃ dīpān bodhya diśo daśa
upoṣya jāgaraṃ kuryādgītavādyaṃ viśeṣataḥ /
evaṃ kṛte mahīpāla na bhaved ugraduḥkhabhāk
sūryaloke vaset tāvad yāvat kalpaśatatrayam /
gandharvair apsarobhiśca sevyamāno nṛpottama
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0