Revākhāṇḍa (revised text) · Chapter 174
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śuddheśvaratīrthamāhātmyavarṇanaṃ nāma trisaptatyuttaraśatatamo 'dhyāyaḥ ||
RKV adhyāya 174
śrīmārkaṇḍeya uvāca:
gopeśvaraṃ tato gaccheduttare narmadātaṭe /
yatra snānena caikena mucyante pātakair narāḥ
tatra tīrthe tu yaḥ snātvā kurute prāṇasaṃkṣayam /
barhiyuktena yānena sa gacchecchivamandire
krīḍitvā suciraṃ kālaṃ śivaloke narādhipa /
iha mānuṣyatāṃ prāpya rājā bhavati vīryavān
hastyaśvarathasampanno dāsīdāsasamanvitaḥ /
pūjyamāno narendraiśca jīvedvarṣaśataṃ naraḥ
samprāpte kārttike māsi navamyāṃ śuklapakṣataḥ /
sopavāsaḥ śucirbhūtvā dīpakāṃstatra dāpayet
gandhapuṣpaiḥ samabhyarcya rātrau kurvīta jāgaram /
tasya yatphalamuddiṣṭaṃ tacchṛṇuṣva narādhipa
yāvatpuṇyaṃ phalaṃ saṃkhyā dīpakānāṃ tathaiva ca /
tāvadyugasahasrāṇi śivaloke mahīyate
tasmiṃstīrthe tu rājendra liṅgapūraṇakaṃ vidhim /
tathaiva padmakaiścaiva dadhibhaktaistathaiva ca
yastu kuryān naraśreṣṭha tasya puṇyaphalaṃ śṛṇu /
yāvanti tilasaṃkhyāni dadhibhaktaṃ tathaiva ca
padmasaṃkhyā śive loke modate kālamīpsitam /
tasmiṃstīrthe tu rājendra yatkiṃcid dīyate nṛpa
sarvaṃ koṭiguṇaṃ tasya saṃkhyātuṃ vā na śakyate /
evaṃ te kathitaṃ sarvaṃ sarvatīrthamanuttamam
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0