Revākhāṇḍa (revised text) · Chapter 175

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe gopeśvaratīrthamāhātmyavarṇanaṃ nāma catuḥsaptatyuttaraśatatamo 'dhyāyaḥ ||
RKV adhyāya 175
śrīmārkaṇḍeya uvāca:
uttare narmadākūle bhṛgukṣetrasya madhyataḥ /
kapileśvaraṃ tu vikhyātaṃ viśeṣātpāpanāśanam

yo 'sau sanātano devaḥ purāṇe paripaṭhyate /
vāsudevo jagannāthaḥ kapilatvamupāgataḥ

pātālaṃ sutalaṃ nāma tasyaiva nitalaṃ hyadhaḥ /
gabhastigaṃ ca tasyādho hyandhatāmisrameva ca

pātālaṃ saptamaṃ yacca hyadhastātsaṃsthitaṃ mahat /
vasate tatra vai devaḥ purāṇaḥ parameśvaraḥ

sa brahmā sa mahādevaḥ sa devo garuḍadhvajaḥ /
pūjyamānaḥ suraiḥ siddhais tiṣṭhate brahmavādibhiḥ

vasatas tasya rājendra kapilasya jagadguroḥ /
vināśaṃ cāgrataḥ prāptāḥ kṣaṇena sagarātmajāḥ

bhasmībhūtāṃstu tāndṛṣṭvā kapilo munisattamaḥ /
jagāma paramaṃ śokaṃ cintyamāno 'tha kilbiṣam

sarvasaṅgaparityāge citte nirviṣayīkṛte /
ayuktaṃ ṣaṣṭisahasrāṇāṃ kartaṃ mama vināśanam

kṛtasya karaṇaṃ nāsti tasmātpāpavināśanam /
gatvā tu kāpilaṃ tīrthaṃ mocayāmyaghamātmanaḥ

pātālaṃ tu tato muktvā kapilo munisattamaḥ /
tapaścacāra sumahannarmadātaṭamāsthitaḥ

vratopavāsairvividhaiḥ snānadānajapādikaiḥ /
paraṃ nirvāṇamāpannaḥ pūjayanrudramavyayam

tatra tīrthe tu yaḥ snātvā pūjayet parameśvaram /
gosahasraphalaṃ tasya labhate nātra saṃśayaḥ

jyeṣṭhamāse tu samprāpte śuklapakṣe caturdaśī /
tatra snātvā vidhānena bhaktyā dānaṃ prayacchati

pātrabhūtāya viprāya svalpaṃ vā yadi vā bahu /
akṣayaṃ tatphalaṃ proktaṃ śivena parameṣṭhinā

aṅgārakadine prāpte caturthyāṃ navamīṣu ca /
snānaṃ karoti puruṣo bhaktyopoṣya varāṅganā

rūpamaiśvaryamatulaṃ saubhāgyaṃ saṃtatiṃ parām /
labhate saptajanmāni nityaṃ nityaṃ punaḥ punaḥ

paurṇamāsyāmamāvāsyāṃ snātvā piṇḍaṃ prayacchati /
tasya te dvādaśābdāni tṛptā yānti surālayam

tatra tīrthe tu yo bhaktyā dadyāddīpaṃ suśobhanam /
jāyate tasya rājendra mahādīptiḥ śārīrajā

tatra tīrthe mṛtānāṃ tu jantūnāṃ sarvadā kila /
anivartikā bhavetteṣāṃ gatistu śivamandirāt