Revākhāṇḍa (revised text) · Chapter 173

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmye māṇḍavyatīrthamāhātmyavarṇanaṃ nāma dvisaptatyadhikaśatatamo 'dhyāyaḥ ||
RKV adhyāya 173
śrīmārkaṇḍeya uvāca:
tato gacchettu rājendra tīrthaṃ paramaśobhanam /
narmadādakṣiṇe kūle sarvapāpapraṇāśanam

siddheśvaramiti khyātaṃ mahāpātakanāśanam /
yatra śuddhiṃ parāṃ prāpto devadevo maheśvaraḥ /
purā hatyāyutaḥ pārtha devadevas triśūladhṛk

purā pañcaśirā āsīdbrahmā lokapitāmahaḥ /
tenānṛtaṃ vacaścoktaṃ kasmiṃścitkāraṇāntare

tacchrutvā sahasā tasmai cukopa parameśvaraḥ /
chedayāmāsa bhagavānmūrdhānaṃ karajaistadā

tasya tatkarasaṃlagnaṃ cyavate na kadācana /
tato hi devadeveśaḥ paryaṭan pṛthivīmimām

tato vārāṇasīṃ prāptastasyāṃ tadapatacchiraḥ /
patite tu kapāle ca brahmahatyā na muñcati

tatastu sāgare gatvā pūrve ca dakṣiṇe tathā /
paścime cottare pārtha devadevo maheśvaraḥ

paryaṭansarvatīrtheṣu brahmahatyā na muñcati /
narmadādakṣiṇe kūle sutīrthaṃ prāptavān prabhuḥ

kulakoṭiṃ samāsādya prārthayāmāsa cātmavān /
prāyaścittaṃ tataḥ kṛtvā babhūva gatakalmaṣaḥ

tato niṣkalmaṣo jāto devadevo maheśvaraḥ /
hatvā surebhyastatsthānaṃ tataścāntardadhe prabhuḥ

tadāprabhṛti tattīrthaṃ śuddharudreti kīrtitam /
vikhyātaṃ triṣu loke brahmahatyāharaṃ param

māse māse site pakṣe 'māvāsyāyāṃ yudhiṣṭhira /
snātvā tatra vidhānena tarpayet pitṛdevatāḥ

dadyāt piṇḍaṃ pitḥṇāṃ tu bhāvitenāntarātmanā /
tasya te dvādaśābdāni sutṛptāḥ pitaro nṛpa

gandhadhūpapradīpādyairabhyarcya parameśvaram /
śuddheśvarābhidhānaṃ tu śivaloke mahīyate

etatte kathitaṃ rājañchuddharudram anuttamam /
mayā śrutaṃ yathā devasakāśācchūlapāṇinaḥ /
mucyate sarvapāpebhyo rudralokaṃ sa gacchati