Revākhāṇḍa (revised text) · Chapter 16

|| iti śrīskānde mahāpurāṇa ekāśītisāhasryāṃ pañcama āvantyakhaṇḍe revākhaṇḍe narmadāmāhātmye sṛṣṭisaṃharaṇasaṃrambhavarṇanaṃ nāma pañcadaśo 'dhyāyaḥ ||
RKV adhyāya 16
śrīmārkaṇḍeya uvāca:
samātṛbhirbhūtagaṇaśca ghorairvṛtaḥ samantātsa nanarta śūlī /
gajendracarmāvaraṇe vasānaḥ saṃhartukāmaśca jagatsamastam

maheśvaraḥ sarvasureśvarāṇāṃ mantrair anekekhabaddhamālī /
medovasāraktavicarcitāṅgastrailokyadāhe praṇanarta śambhuḥ

sa kālarātryā sahito mahātmā kāle trilokīṃ sakalāṃ jahāra /
saṃvartakākhyaḥ sahabhānubhāvaḥ śambhurmahātmā jagato variṣṭhaḥ

sa visphuliṅgotkaradhūmamiśraṃ maholkavajrāśanivātatulyam /
tato 'ṭṭahāsaṃ pramumoca ghoraṃ vivṛtya vaktraṃ vaḍavāmukhābham

sahasravajrāśanisaṃnibhena tenāṭṭahāsena harodgatena /
āpūritāstatra diśo daśaiva saṃkṣobhitāḥ sarvamahārṇavāśca

sa brahmalokaṃ prajagāma śabdo brahmāṇḍabhāṇḍaṃ pracacāla sarvam /
kimetadityākulacetanāste vitrastarūpā ṛṣayo babhūvuḥ

praṇamya sarve sahasaiva bhītā brahmāṇamūcuḥ parameśvareśam /
bhītāśca sarve ṛṣayastataste surāsuraiścaiva mahoragaiśca

vidyutprabhābhāsurabhīṣaṇāṅgaḥ ka eṣa cikrīḍati bhūtalasthaḥ /
kālānalaṃ gātramidaṃ dadhāno yasyāṭṭahāsena jagadvimūḍham

vitrastarūpaṃ prababhau kṣaṇena saṃhartumicchetkimayaṃ trilokīm /
sārdhaṃ tvayā saptabhirarṇakaiśca janastapaḥ satyamabhiprayāti

saṃhartukāmo hi ka eṣa deva etatsamastaṃ kathayāprameya /
na dṛṣṭametad viṣamaṃ kadāpi jānāsi tattvaṃ paramo mato naḥ

niśamya tadvākyamathābabhāṣe brahmā samāśvāsya surādisaṅghān

śrībrahmovāca:
sa eṣa kālastridivaṃ tvaśeṣaṃ saṃhartukāmo jagadakṣayātmā /
pūrṇe ca śete parivatsarāṇāṃ bhaviṣyatīśānavibhurna citram

saṃvatsaro 'yaṃ parivatsaraśca udvatsaro vatsara eṣa devaḥ /
dṛṣṭo 'pyadṛṣṭaḥ prahutaḥ prakāśī sthūlaśca sūkṣmaḥ paramāṇureṣaḥ

nātaḥ paraṃ kiṃcidihāsti loke parāparo 'yaṃ prabhurātmavādī /
tuṣyeta me kālasamānarūpa ityevamuktvā bhagavānsureśaḥ

sanatkumārapramukhaiḥ sametaḥ saṃtoṣayāmāsa tato yatātmā

brahmovāca:
namo 'stu sarvāya suśāntamūrtāye hyaghorarūpāya namonamaste /
sarvātmane sarva namonamaste mahātmane bhūtapate namaste

oṅkāra huṅkārapariṣkṛtāya svadhāvaṣaṭkāra namonamaste /
guṇatrayeśāya maheśvarāya te trayīmayāya triguṇātmane namaḥ

tvaṃ śaṅkaratvaṃ hi maheśvaro 'si pradhānamagryaṃ tvamasi praviṣṭaḥ /
tvaṃ viṣṇurīśaḥ prapitāmahaśca tvaṃ saptajihvastvamanantajihvaḥ

sraṣṭāsi sṛṣṭiśca vibho tvameva viśvasya vedyaṃ ca paraṃ nidhānam /
āhurdvijā vedavido vareṇyaṃ parātparastvaṃ parataḥ paro 'si

sūkṣmātisūkṣmaṃ pravadanti yacca vāco nivartanti mano yataśca

śrīmahādeva uvāca:
tvayā stuto'haṃ vividhaiśca mantraiḥ puṣṇāmi śāntiṃ tava padmayone /
īkṣasva māṃ lokamimaṃ jvalantaṃ vaktrairanekaiḥ prasabhaṃ harantam

evamuktvā sa deveśo devyā saha jagatpatiḥ /
pitāmahaṃ samāśvāsya tatraivāntaradhīyata

idaṃ mahatpuṇyatamaṃ variṣṭhaṃ stotraṃ niśamyeha gatiṃ labhante /
pāpairanekaiḥ pariveṣṭitā ye prayānti rudraṃ vimalairvimānaiḥ

bhayaṃ ca teṣāṃ na bhavetkadācitpaṭhanti ye tāta idaṃ dvijāgryāḥ /
saṅgrāmacaurāgnivane tathābdhau teṣāṃ śivastrāti na saṃśayo 'tra