Revākhāṇḍa (revised text) · Chapter 149

|| iti śrīskānde mahāpurāṇe ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe maṅgaleśvaratīrthamāhātmyavarṇanaṃ nāmāṣṭācatvāriṃśadadhikaśatatamo 'dhyāyaḥ ||
RKV adhyāya 149
śrīmārkaṇḍeya uvāca:
tasyaivānantaraṃ tīrthaṃ liṅgeśvaramiti śrutam /
darśanād devadevasya yatra pāpaṃ praṇaśyati

kṛtvā tu kadanaṃ ghoraṃ dānavānāṃ yudhiṣṭhira /
vārāhaṃ rūpamāsthāya narmadāyāṃ vyavasthitaḥ

tatra tīrthe tu yaḥ snānaṃ kṛtvā devaṃ namasyati /
sa mucyate nṛpaśreṣṭha mahāpāpaiḥ purākṛtaiḥ

dvādaśyāṃ kṛṣṇapakṣasya śukle ca samupoṣitaḥ /
gandhamālyairjagannāthaṃ pūjayet pāṇḍunandana

brāhmaṇāṃśca mahābhāga dānasaṃmānabhojanaiḥ /
pūjayetparayā bhaktyā tasya puṇyaphalaṃ śṛṇu

satrayājiphalaṃ jantur labhate dvādaśābdakaiḥ /
brāhmaṇānbhojayaṃstatra tadeva labhate phalam

tarpayitvā pitḥn devān snātvā tadgatamānasaḥ /
japed dvādaśanāmāni devasya purataḥ sthitaḥ

māsi māsi nirāhāro dvādaśyāṃ kurunandana /
keśavaṃ pūjayen nityaṃ māsi mārgaśire budhaḥ

pauṣe nārāyaṇaṃ devaṃ māghamāse tu mādhavam /
govindaṃ phālgune māsi viṣṇuṃ caitre samarcayet

vaiśākhe madhuhantāraṃ jyeṣṭhe devaṃ trivikramam /
vāmanaṃ tu tathāṣāḍhe śrāvaṇe śrīdharaṃ smaret

hṛṣīkeśaṃ bhādrapade padmanābhaṃ tathāśvine /
dāmodaraṃ kārttike tu kīrtayan nāvasīdati

vācikaṃ mānasaṃ pāpaṃ karmajaṃ yatpurā kṛtam /
tannaśyati na sandeho māsanāmānukīrtanāt

svayaṃ vinuddhaḥ satatamunmiṣannimiṣaṃstathā /
śīghraṃ prapaśya bhuñjāno mantrahīnaṃ samudgiret

paramāpadgatasyāpi jantoreṣā pratikriyā /
yanmāsādhipater viṣṇor māsanāmānukīrtanam

tā niśāste ca divasāste māsāste ca vatsarāḥ /
narāṇāṃ saphalā yeṣu cintito bhagavānhariḥ

paramāpadgatasyāpi yasya devo janārdanaḥ /
nāvasarpati hṛtpadmātsa yogī nātra saṃśayaḥ

te bhāgyahīnā manujāḥ suśocyāste bhūmibhārāya kṛtāvatārāḥ /
acetanāste paśubhiḥ samānā ye bhaktihīnā bhagavatyanante

te pūrṇakāryāḥ puruṣāḥ pṛthivyāṃ te svāṅgapātādbhuvanaṃ punanti /
vicakṣaṇā viśvavibhūṣaṇāste ye bhaktiyuktā bhagavatyanante

sa eva sukṛtī tena labdhaṃ janmataroḥ phalam /
citte vacasi kāye ca yasya devo janārdanaḥ

etattīrthavaraṃ puṇyaṃ liṅgo yatra janārdanaḥ /
vañcayitvā ripūnsaṃkhye krodho bhūtvā sanātanaḥ

upaplave candramaso raveśca yo hyaṣṭakānāmayanadvaye ca /
pānīyamapyatra tilairvimiśraṃ dadyāt pitṛbhyaḥ prayato manuṣyaḥ

ghoṇonmīlitamerurandhranivaho duḥkhābdhimajjatplavaḥ prādurbhūtarasātalodarabṛhatpaṅkārdhamagnakṣuraḥ /
phūtkārotkaranunnavātavidaladdigdantinādaśrutinyastastabdhavapuḥ śrutirbhavatu vaḥ kroḍo hariḥ śāntaye