Revākhāṇḍa (revised text) · Chapter 148

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe siddheśvaratīrthamāhātmyavarṇanaṃ nāma saptacatvāriṃśadadhikaśatatamo 'dhyāyaḥ ||
RKV adhyāya 148
śrīmārkaṇḍeya uvāca:
tato gacchenmahīpāla tīrthamaṅgārakaṃ śivam /
uttare narmadākūle sarvapāpakṣayaṃkaram

caturthyaṅgārakadine saṃkalpya kṛtaniścayaḥ /
snāyādastaṃ gate sūrye sandhyopāsanatatparaḥ

pūjayellohitaṃ bhaktyā gandhamālyavibhūṣaṇaiḥ /
saṃsthāpyasthaṇḍile devaṃ raktacandanacarcitam

aṅgārakāyeti namaḥ karṇikāyāṃ prapūjayet /
kujāya bhūmiputrāya raktāṅgāya suvāsase

harakopodbhavāyeti svedajāyātibāhave /
sarvakāmapradāyeti pūrvādiṣu daleṣu ca

evaṃ sampūjya vidhivaddadyādarghyaṃ vidhānataḥ /
bhūmiputra mahāvīrya svedodbhava pinākinaḥ

aṅgāraka mahātejā lohitāṅga namo 'stu te /
karakaṃ vārisaṃyuktaṃ śālitaṃdulapūritam

sahiraṇyaṃ savastraṃ ca modakopari saṃsthitam /
brāhmaṇāya nivedyaṃ tatkujo me prīyatāmiti

arghaṃ dattvā vidhānena raktacandanavāriṇā /
raktapuṣpasamākīrṇaṃ tilataṃdulamiśritam

kṛtvā tāmramaye pātre maṇḍale vartule śubhe /
kṛtvā śirasi tatpātraṃ jānubhyāṃ dharaṇīṃ gataḥ

mantrapūtaṃ mahābhāga dadyād arghyaṃ vicakṣaṇaḥ /
tato bhuñjīta maunena kṣāratilāmlavarjitam

snigdhaṃ mṛdusamadhuram ātmanaḥ śreya icchatā /
evaṃ caturthe samprāpte caturthyaṅgārake nṛpa

sauvarṇaṃ kārayeddevaṃ yathāśakti surūpiṇam /
sthāpayet tāmrake pātre guḍapīṭhasamanvite

gandhapuṣpādibhirdevaṃ pūjayed guḍasaṃsthitam /
īśānyāṃ sthāpayeddevaṃ guḍatoyasamanvitam

kāsāreṇa tathāgneyyāṃ sthāpayet karakaṃ param /
raktatandulasaṃmiśraṃ nairṛtyāṃ vāyugocare

sthāpayenmodakaiḥ sārdhaṃ caturthaṃ karakaṃ budhaḥ /
sūtreṇa veṣṭitagrīvaṃ gandhamālyair alaṃkṛtam

śaṅkhatūryaninādena jayaśabdādimaṅgalaiḥ /
raktāmbaradharaṃ vipraṃ raktamālyānulepanam

vedimadhyagataṃ vāpi mahadāsanasaṃsthitam /
surūpaṃ subhagaṃ śāntaṃ sarvabhūtahite ratam

vedavidyāvratasnātaṃ sarvaśāstraviśāradam /
pūjayitvā yathānyāyaṃ vācayetpāṇḍunandana

raktāṃ gāṃ ca tato dadyād raktenānaḍuhā saha /
prīyatāṃ bhūmijo devaḥ sarvadaivatapūjitaḥ

vipraṃ pradakṣiṇīkṛtya patnīputrasamanvitaḥ /
pitṛmātṛsuhṛtsārddhaṃ kṣamāpya ca visarjayet

evaṃ kṛtasya tasyātha tasmiṃstīrthe viśeṣataḥ /
yatpuṇyaṃ phalamuddiṣṭaṃ tatte sarvaṃ vadāmyaham

sapta janmāni rājendra surūpaḥ subhago bhavet /
tīrthasyāsya prabhāvena nātra kāryā vicāraṇā

akāmo vā sakāmo vā tatra tīrthe mṛto naraḥ /
aṅgārakapuraṃ yāti devagandharvapūjitaḥ

upabhujya yathānyāyaṃ divyānbhogānanuttamān /
iha mānuṣyaloke vai rājā bhavati dhārmikaḥ

surūpaḥ subhagaścaiva sarvavyādhivivarjitaḥ /
jīvedvarṣaśataṃ sāgraṃ sarvalokanamaskṛtaḥ