Revākhāṇḍa (revised text) · Chapter 139
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śakratīrthamāhātmyavarṇanam nāmāṣṭatriṃśadadhikaśatatamo 'dhyāyaḥ ||
RKV adhyāya 139
śrīmārkaṇḍeya uvāca:
tato gacchen mahārāja somatīrthamanuttamam /
yatra somastapastaptvā nakṣatrapathamāsthitaḥ
tatra tīrthe tu yaḥ snāyādācamya vidhipūrvakam /
kṛtajāpyo raviṃ dhyāyet tasya puṇyaphalaṃ śṛṇu
ṛgvedayajurvedābhyāṃ sāmavedena bhārata /
japato yatphalaṃ proktaṃ gāyatryā cātra tatphalam
tatra tīrthe tu yo bhaktyā brāhmaṇān bhojayecchuciḥ /
tena samyagvidhānena koṭirbhavati bhojitā
pādukopānahau chatraṃ vastrakambalavājinaḥ /
yo datte vipramukhyāya tasya tatkoṭisaṃmitam
sahasraṃ tu sahasrāṇāmanṛcāṃ yastu bhojayet /
ekasya mantrayuktasya kalāṃ nārhati ṣoḍaśīm
evaṃ tu bhojayet tatra bahvṛcaṃ vedapāragam /
śākhāntargam athādhvaryuṃ chandogaṃ vā samāptigam
agnihotrasahasrasya yatphalaṃ prāpyate budhaiḥ /
samaṃ tadvedaviduṣā tīrthe somasya tatphalam
bhojayedyaḥ śataṃ teṣāṃ sahasraṃ labhate naraḥ /
ekasya yogayuktasya tatphalaṃ kavayo viduḥ
saṃnirudhyendriyagrāmaṃ yatrayatra vasen muniḥ /
tatratatra kurukṣetraṃ naimiṣaṃ puṣkarāṇi ca
tasmātsarvaprayatnena grahaṇe candrasūryayoḥ /
saṃkrāntau ca vyatīpāte yogī bhojyo viśeṣataḥ
saṃnyāsaṃ kurute yastu tatra tīrthe yudhiṣṭhira /
vimānena mahābhāgāḥ sa yāti tridivaṃ naraḥ
somasyānucaro bhūtvā tenaiva saha modate
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0