Revākhāṇḍa (revised text) · Chapter 138
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe karkaṭeśvaratīrthamāhātmyavarṇanaṃ nāma saptatriṃśadadhikaśatatamo 'dhyāyaḥ ||
RKV adhyāya 138
śrīmārkaṇḍeya uvāca:
tato gacchet pāṇḍuputra śakratīrtham anuttamam /
yatra siddho mahābhāgo devarājaḥ śatakratuḥ
gautamena purā śaptaṃ jñātvā devāḥ sureśvaram /
brahmādyā devatāḥ sarva ṛṣayaśca tapodhanāḥ
gautamaṃ prārthayāmāsur vākyaiḥ sānunayaiḥ śubhaiḥ /
gatarājyaṃ gataśrīkaṃ śakraṃ prati munīśvara
indrena rahitaṃ rājyaṃ na kaścit kāmayed dvija /
devo vā mānavo vāpi etatte viditaṃ prabho
tasya tvaṃ bhagayuktasya dayāṃ kuru dvijottama /
gataścādarśanaṃ śakro dūṣitaḥ svena pāpmanā
devānāṃ vacanaṃ śrutvā gautamo vedavittamaḥ /
tatheti kṛtvā śakrasya varaṃ dātuṃ pracakrame
etadbhagasahasraṃ tu purā jātaṃ śatakrato /
tallocanasahasraṃ tu matprasādād bhaviṣyati
evamuktaḥ sahasrākṣaḥ praṇamya munisattamam /
brāhmaṇāṃs tān mahābhāgān narmadāṃ pratyagāt tataḥ
snātvā sa vimale toye saṃsthāpya tripurāntakam /
jagāma tridaśāvāsaṃ pūjyamāno 'psarogaṇaiḥ
tatra tīrthe tu yaḥ snātvā pūjayet parameśvaram /
paradārābhigamanān mucyate pātakān naraḥ
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0