Revākhāṇḍa (revised text) · Chapter 140
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe somatīrthamāhātmyavarṇanaṃ nāmaikonacatvāriṃśadadhikaśatatamo 'dhyāyaḥ ||
RKV adhyāya 140
mārkaṇḍeya uvāca:
tato gacchenmahārāja nandāhradamanuttamam /
yatra siddhā mahābhāgā nandā devī varapradā
mahiṣāsure mahākāye purā devabhayaṃkare /
śūlinyā śūlabhinnāṅge kṛte dānavasattame
yenaikādaśarudrāśca hyādityāḥ samarudgaṇāḥ /
vasavo vāyunā sārddhaṃ candrādityau sureśvara
balinā nirjitā yena brahmaviṣṇumaheśvarāḥ /
saṅgrāme sumahāghore kṛte devabhayaṃkare
kṛtvā tatkadanaṃ ghoraṃ nandā devī sureśvarī /
yasmātsnātā viśālākṣī tena nandāhradaḥ smṛtaḥ
tatra tīrthe tu yaḥ snātvā nandāmuddiśya bhārata /
dadāti dānaṃ viprebhyaḥ so 'śvamedhaphalaṃ labhet
bhairavaṃ caiva kedāraṃ tathā rudraṃ mahālayam /
nandāhradaścaturthaḥ syātpañcamaṃ bhuvi durlabham
bahavastaṃ na jānanti kāmarāgasamanvitāḥ /
narmadāyā hradaṃ puṇyaṃ sarvapātakanāśanam
tatra tīrthe tu yaḥ snātvā nandāṃ devīṃ prapūjayet /
kiṃ tasya himavanmadhyagamanena prayojanam
paramārthamavijñāya paryaṭanti tamovṛtāḥ /
teṣāṃ samāgame pārtha śrama eva hi kevalam
pṛthivyāṃ sāgarāntāyāṃ snānadānena yatphalam /
tatphalaṃ samavāpnoti snātvā nandāhrade nṛpa
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0