Revākhāṇḍa (revised text) · Chapter 137
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ahalyātīrthamāhātmyavarṇanaṃ nāma ṣaṭtriṃśadadhikaśatatamo 'dhyāyaḥ ||
RKV adhyāya 137
mārkaṇḍeya uvāca:
dharmaputra tato gacchet karkaṭeśvaramuttamam /
uttare narmadākūle sarvapāpakṣayaṃkaram
tatra snātvā vidhānena yastu pūjayate śivam /
anivartikā gatistasya rudralokād asaṃśayam
tasya tīrthasya māhātmyaṃ purāṇe yacchrutaṃ mayā /
na tadvarṇayituṃ śakyaṃ saṃkṣepeṇa vadāmyataḥ
tatra tīrthe tu yaḥ kuryātkiṃcitkarma śubhāśubham /
harṣān madān mahārāja tatsarvaṃ jāyate 'kṣayam
tatra tīrthe tapastaptvā vālakhilyā marīcayaḥ /
ramante 'dyāpi lokeṣu svecchayā kurunandana
tatrasthāstanna jānanti narājñānabahiṣkṛtāḥ /
śarīrastham ivātmānam akṣayaṃ jyotikhyayam
tatra tīrthe nṛpaśreṣṭha devī nārāyaṇī purā /
adyāpi tapate ghoraṃ tapo yāvatkilārbudam
tatra tīrthe tu yaḥ snātvā tarpayet pitṛdevatāḥ /
tasya te dvādaśābdāni tṛptiṃ yānti pitāmahāḥ
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0