Rasaratnākara · Chapter 3.13

RRĀ, 3, 13
dṛṣṭayogaphalasiddhidaṃ dhruvaṃ pāradasya varajāraṇe hitam /
sattvapātanam anekayogato dvaṃdvamelam abhiṣekam āryakam

{abhra:: śodhana}
mustākvāthena saptāhaṃ kuryāddhānyābhrakaṃ plutam /
śigrusūraṇarambhānāṃ kaṃdasyaikasya ca dravaiḥ

peṭārīmūlajaṃbīradrāvairvāpyaṃ pariplutam /
itthaṃ plutasyābhrakasya pādāṃśaṃ ṭaṃkaṇaṃ kṣipet

dinaikaṃ mardayetkhalve yuktamamlena kenacit

{kāntaloha, mākṣika, uparasa:: sattva:: pātana}
guñjāguggululākṣorṇāsarjīsarjarasaṃ guḍam /
kṣudramīnaṃ yavakṣāraṃ kācapiṇyākasūraṇam

bhūlatā triphalā vahniḥ kṣīrakandaṃ punarnavā /
dhattūro lāṅgalī pāṭhā balā gaṃdhakatiktakam

gokṣīraṃ paṃcalavaṇaṃ sarpavṛścikaviṣaṃ madhu /
ṣaḍbinduḥ kṣudraśambūkamasthīni śaśakasya ca

pārāvatamalaṃ tryūṣam iṃdragopaṃ ca śigrukam /
godhūmaṃ sarṣapaṃ tulyaṃ chāgīdugdhena mardayet

etadvyastaṃ samastaṃ vā yāmamātreṇa piṇḍitam /
asya piṇḍasya bhāgaikaṃ dvibhāgaṃ śodhitābhrakam

pañcamāhiṣabhāgaikaṃ sarvamekatra lolayet /
karṣāṃśā vaṭikāḥ kāryāḥ kiṃcicchāyāviśoṣitāḥ

khadirāṅgārasaṃtapte koṣṭhīyantre kṣipan kṣipan /
vaṭikāḥ pañcapañcaiva vaṅkanālena saṃdhaman

samāptau kiṭṭamādāya sphoṭayetsvāṅgaśītalam /
vartulaṃ sattvamādāya śeṣakiṭṭaṃ vicūrṇayet

cūrṇādardhaṃ pūrvapiṇḍaṃ tadvanmāhiṣapañcakam /
ekīkṛtya dhamettadvatsattvaṃ tattatsamāharet

ityevaṃ ca punaḥ kuryāttridhā sattvaṃ vimuñcati /
anena kramayogena kāntasattvaṃ ca mākṣikam

kaṭhinoparasāścānye śuddhā bhūnāgamṛttikā /
muñcanti sattvasaṃghātaṃ grāhayettatpṛthak pṛthak

{abhra:: sattva:: mṛdūkaraṇa}
abhrasattvaṃ samādāya samāṃśaṃ kācaṭaṃkaṇam /
dattvā dattvā trivāraṃ tu vajramūṣāgataṃ dhamet

amlavargaṃ snuhīpatraṃ ciñcābījaṃ savalkalam /
kalkayettatra tatsattvaṃ saptavāraṃ niṣecayet

mṛduśubhraṃ bhavetsattvaṃ saptavāraṃ niṣecayet

{abhra:: sattva:: pātana}
dhānyābhraṃ daśabhāgaṃ syāt śuddhanāgaṃ tribhāgakam /
ṭaṃkaṇaṃ mākṣikaṃ sūtaṃ bhāgaikaikaṃ suśodhitam

ūrṇā sarjī yavakṣāraṃ bhāgaṃ bhāgaṃ vimiśrayet /
mardyaṃ mūtrāmlavargābhyāṃ yathāprāptaṃ dināvadhi

ajāpañcāṅgasaṃyuktaṃ pūrvavatsattvapātanam /
kṛtvādāya mṛdu sākṣānnirmalaṃ yojayedadhaḥ

{mākṣika:: sattvam:: pātana}
dolāyaṃtre sāranāle mākṣikaṃ svedayeddinam /
cūrṇitaṃ madhusarpirbhyāṃ lohapātre dinaṃ pacet

ādāya bhāvayed gharme vajrīkṣīrairdināvadhi /
gṛhadhūmairghṛtaiḥ kṣaudraiḥ saṃyuktaṃ mardayeddinam

aṃdhamūṣāgataṃ dhmātaṃ sattvaṃ guṃjānibhaṃ bhavet

{mākṣika:: sattva:: pātana}
kadalīkaṃdatoyena mākṣikaṃ śatadhātape /
bhāvitaṃ pācayedyāmaṃ sājyairvātāritailakaiḥ /
pūrvavaddhamanātsattvam iṃdragopanibhaṃ bhavet

{mākṣika:: sattvam:: pātana}
snuhyarkapayasā stanyairmākṣikaṃ mardayeddinam /
kaṃkuṣṭhaṃ ṭaṃkaṇaṃ caiva pratipādāṃśamiśritam

mūkamūṣāgataṃ dhmātaṃ sattvaṃ maṇinibhaṃ bhavet

{mākṣika:: sattva:: pātana}
kadalīkaṃdatulasījaṃbīrāṇāṃ dravaiḥ kramāt /
bhāvayenmākṣikaṃ ślakṣṇaṃ pratidrāveṇa saptadhā /
ruddhvā dhmāte patetsattvaṃ śukasaṃnibhaṃ śubham

{mākṣika:: sattva:: pātana}
mūtravargāmlavargaiśca dvisaptāhaṃ vibhāvayet /
mākṣikaṃ tīvragharmeṇa dinairamlaiśca mardayet

mitrapañcakasaṃyuktairvaṭī kṛtvā dhamed dṛḍham /
vyomavad vaṃkanālena sattvaṃ śulbanibhaṃ bhavet

{mākṣika:: sattva:: pātana}
stanyaiḥ kaṅkuṣṭhakaiścaiva kadalītoyasaṃyutaiḥ /
mitrapaṃcakasaṃyuktairmākṣikaṃ dinasaptakam

bhāvitaṃ mardayedyāmaṃ dinaṃ vātāritailakaiḥ /
mṛdvagninā pacedyāmaṃ yāvadbhavati golakam /
sattvaṃ kiṃśukapuṣpābhaṃ vyomavaddhamanād bhavet

{vimala:: sattva:: pātana}
vimalānāṃ ca śuddhānāṃ samyaksyāttāpyavadvidhiḥ

{mākṣika:: sattva:: dhautasattva}
suśuddhaṃ mākṣikaṃ cūrṇaṃ mardyamamlena kenacit /
kṣālayedāranālaistu hyadhasthaṃ svarṇacūrṇavat

jāyate tatsamuddhṛtya dhautasattvamidaṃ bhavet /
yojayedvāpane caiva bījānāṃ yatra yatra vai

{mākṣika:: sattva:: pātana}
mākṣikaṃ pañcamitrāktaṃ saptāhānte vaṭīkṛtam /
pūrvavaddhamanenaiva sattvaṃ lākṣānibhaṃ bhavet

{manaḥśilā:: sattva:: pātana}
agastyaśigrujaistoyais tryahaṃ bhāvyā manaḥśilā /
tālakauṣadhayogena sattvaṃ hemanibhaṃ bhavet /
{manaḥśilā:: sattva:: pātana}
gomūtrairmātuluṅgāmlairdinaṃ bhāvyā manaḥśilā /
tāṃ raktapītapuṣpāṇāṃ rasaiḥ pittaiśca bhāvayet

dinānte mardayedyāmaṃ mitrapaṃcakasaṃyutam /
guṭikāṃ kācakūpyantaḥ kṣiptvā tāṃ kācakūpikām /
sarvato'ṅgulamānena vastramṛttikayā limpet

śuṣkāṃ tāṃ vālukāyaṃtre śanairmṛdvagninā pacet /
śuṣke drave nirudhyātha samyak mṛllavaṇairmukham

caṇḍāgninā pacettāvadyāvad dvādaśayāmakam /
svāṃgaśītaṃ samuddhṛtya bhittvā kūpīṃ samāharet

ūrdhvalagnaṃ śilāsattvaṃ bālārkakiraṇopamam

{haritāla:: sattva:: pātana}
bhāgāḥ ṣoḍaśa tālasya viṣaṃ pāradaṭaṃkaṇam /
śvetābhrabaṃgayoścūrṇaṃ pratibhāgaṃ vimiśrayet

sarvaṃ snuhyarkapayasā mardayeddivasatrayam /
śilāvad grāhayetsattvaṃ tālakātsphaṭikopamam

{haritāla:: sattva:: pātana}
snukkṣīrakaṭutumbyutthais tālaṃ bhāvyaṃ dvisaptadhā

tilasarṣapaśigrūṇi lavaṇaṃ mitrapaṃcakam /
ebhistulyaṃ pūrvatālaṃ dinamekaṃ vimardayet

chidramūṣāgataṃ dhmātaṃ bhūdhare sattvamāharet

{haritāla:: sattva:: pātana}
lākṣā rājī guḍaṃ śigruṣṭaṃkaṇaṃ lavaṇaṃ tilāḥ /
ebhistulyaṃ śuddhatālaṃ mardayedravidugdhakaiḥ

dinaṃ vā vajriṇīdugdhaiḥ kuṣmāṇḍasya dravaistathā /
tena kalkena liptāṃtaśchidramūṣāṃ nirodhayet

puṭādvā dhamanād grāhyaṃ sattvaṃ pātālayantrake

{haritāla:: sattva:: pātana}
tālakādaṣṭamāṃśena deyaṃ sūtaṃ ca ṭaṃkaṇam /
kuṣmāṇḍasya rasaiḥ snuhyāḥ kṣīrairmardyaṃ dinatrayam /
tadgolaṃ chidramūṣāṃtargrāhyaṃ sattvaṃ ca pūrvavat

{tuttha:: sattva:: pātana}
lākṣābhayā ca bhūnāgaṃ gṛhadhūmaṃ jaṭākaṇā /
niśāṭaṃkaṇamadhvājyānyebhistulyaṃ ca tutthakam

sarvaṃ mardyamajākṣīrair andhamūṣāgataṃ dhamet /
sattvaṃ kiṃśukapuṣpābhaṃ jāyate nātra saṃśayaḥ

{tuttha:: sattva:: pātana}
haridrāsūraṇāṅkollaṃ taṇḍulī gaṃdhakaṃ guḍam /
madhvājyaṭaṃkaṇaṃ tulyaṃ tutthamebhiḥ samaṃ bhavet

stanyena mardayetsarvaṃ chidramūṣāṃ vilepayet /
ruddhvā pātālayaṃtreṇa dhmāte sattvaṃ vimuñcati

{tuttha:: sattva:: pātana}
tutthasya ṭaṃkaṇaṃ pādaṃ cūrṇayenmadhusarpiṣā /
tutthena miśritaṃ dhmātaṃ koṣṭhīyantre dṛḍhāgninā /
dhāmite muñcate sattvaṃ kīratuṇḍasamaprabham

{varanāgasattva}
sauvīraṃ tīkṣṇacūrṇaṃ ca mūṣāyāmandhayet samam /
haṭhād dhmāte bhavetsattvaṃ varanāgaṃ taducyate

{rasaka:: sattva:: pātana}
kṣārāmlaṃ snehapittaiśca kramād bhāvyaṃ dinaṃ dinam /
puṣpāṇāṃ raktapītānāṃ rasairbhāvyaṃ dinadvayam

rasakaṃ cūrṇayetpaścādūrṇā lākṣā niśābhayā /
ṭaṃkaṇaṃ śigrudhūmaṃ ca bhūnāgaṃ saptamaṃ bhavet

ebhiḥ samaṃ tu taccūrṇamajākṣīreṇa mardayet /
yāmametena kalkena lepyā vārtākamūṣikā

śuṣkā cārdhamukhāṅgārairdhmāte sattvaṃ samāharet

{rasaka:: sattva:: pātana}
rasakasyaikabhāgaṃ tu triphalāmitrapaṃcakam /
rajanīgṛhadhūmaṃ ca daśānāmekabhāgakam

ajākṣīrairdinaṃ mardyam athavāmlena kenacit /
pūrvavad grāhayetsattvaṃ rasakātkuṭilaprabham

{vaikrānta:: sattva:: pātana}
vandhyācūrṇaṃ ca vaikrāṃtaṃ chāyāyā mardayetsamam /
ajāmūtrairdinaikaṃ tu sattvaṃ rajatavad bhavet

{vaikrānta:: sattva:: pātana}
mokṣamoraṭapālāśakṣāraṃ gomūtragālitam /
gṛhītamātape śuṣkaṃ vajrakandaṃ ca ṭaṃkaṇam

lākṣā śikhiśikhātulyaṃ vaikrāṃtaṃ sarvatulyakam /
meṣaśṛṃgīdravair mardyam etatsarvaṃ dināvadhi

piṇḍitaṃ mūkamūṣāṃtaḥ kṛtvā dhāmyaṃ haṭhāgninā /
tatraiva muñcate sattvaṃ vaikrāṃtaṃ rasabandhakam

{vaikrānta:: sattva:: pātana}
vaikrāṃtānāṃ palaikaṃ tu karṣaikaṃ ṭaṃkaṇasya ca /
ravikṣīrairdinaṃ bhāvyamatha śigrudravairdinam

guṃjāpiṇyākavahnīnāṃ pratikarṣaṃ niyojayet /
etena gulikāṃ kṛtvā koṣṭhīyantre dhamed dṛḍham

śaṃkhakundendusaṃkāśaṃ sattvaṃ vaikrāṃtajaṃ bhavet

{vaikrānta:: sattva:: pātana}
vaikrāṃtaṃ vajrakaṃdaṃ ca samaṃ snukpayasā samam /
mahiṣīnavanītaṃ ca sakṣaudraṃ mardayeddinam /
pūrvavaddhamanāt sattvam iṃdragopanibhaṃ bhavet

{gairika:: sattva:: pātana}
gairikaṃ raktavargeṇa pītavargeṇa bhāvitam /
saptāhaṃ mardayedyāmaṃ mitrapaṃcakasaṃyutam /
tadvaṭī koṣṭhikāyaṃtre sattvaṃ muñcati nirmalam

{saurāṣṭrī:: sattva:: pātana}
sitā sitā ca saurāṣṭrī gopittairbhāvayettu tām /
śatavāraṃ prayatnena mitrapaṃcakasaṃyutam /
dhamanānmuñcate sattvaṃ krāmakaṃ koṣṭhiyaṃtrake

{sasyaka:: sattva:: pātana}
sasyakaṃ cūrṇitaṃ bhāvyaṃ dinaṃ śaśakaraktakaiḥ /
strīmūtrairvātha gomūtraistatpādāṃśāṃ niśāṃ kṣipet /
mardyaṃ karaṃjatailena yāmaikaṃ golakaṃ ca tat

aṃdhamūṣāgataṃ dhāmyaṃ ghaṭikārdhaṃ dṛḍhāgninā /
iṃdragopakasaṃkāśaṃ sattvaṃ muñcati śobhanam

{kāsīsa:: sattva:: pātana}
caturvidhaṃ tu kāsīsaṃ raktaṃ pītaṃ sitāsitam /
mardayet pittavargeṇa tiktakośātakīdravaiḥ

kāsamardadravaiścaiva mitrapaṃcakasaṃyutaiḥ /
tadvaṭīḥ koṣṭhikāyaṃtre dhmāte sattvaṃ vimuñcati

{rājāvarta:: sattva:: pātana}
rājāvartamayaḥ pātre pācayenmāhiṣairghṛtaiḥ /
payobhiśca dinaṃ pacyānmitrapaṃcakasaṃyutam

rajanyāḥ pañcagavyena piṇḍībaddhaṃ tu kārayet /
khadirāṃgārasaṃyogāt koṣṭhyāṃ sattvaṃ vimuñcati

{srotoñjana:: parīkṣā}
valmīkaśikharākāraṃ bhaṅge nīlotpaladyuti /
gharṣaṇe gairikacchāyaṃ srotoṃjanamidaṃ bhavet

{srotoñjana:: sattva:: pātana}
rājāvartakavatsattvaṃ grāhyaṃ srotoṃjanādapi

{dvandvam. of vyomasattva and minerals}
vyomasattvasya cūrṇaṃ tu yatkiṃciddhātucūrṇakam /
dvandvamelāpaliptāyāṃ mūṣāyāṃ tad dvayaṃ samam

dhmātavyam arivargeṇa kṣipte milati tatkṣaṇam

{sattva:: melāpana}
viṣaṃ ṭaṅkaṇaguṃjāśca khuraṃ śṛṅgaṃ ca bheṣajam /
maṇḍūkavasayā piṣṭvā mūṣālepaṃ tu kārayet

tasyāṃ milati sattvāni cūrṇāni vividhāni ca /
{dvandvamel.:: lepa for ~}
trikṣāraṃ dhātakīpuṣpaṃ gugguluṃ ca samaṃ samam /
strīstanyaiḥ peṣito lepo dvaṃdvamelāpane hitaḥ

{sarvasattvamelāpana (2)}
varṣābhūḥ kadalīkaṃdaḥ kākamācī punarnavā /
guṃjā narakapālaṃ ca ṭaṃkaṇaṃ peṣayetsamam /
anena pūrvavallepāddhemābhraṃ milati kṣaṇāt

{melāpana:: metals, sattva and/or mahārasas}
tāraṃ ca vyomasattvaṃ ca anenaiva tu melayet /
lāṅgalī camarīkeśānkuśakārpāsayoḥ phalam

bhūlatām iṃdragopaṃ ca pāṣāṇabhedikā samam /
nārīstanyena saṃpeṣya mūṣālepaṃ tu kārayet

sarvalohāni sattvāni tathā caiva mahārasāḥ /
milanti nātra saṃdehas tīvradhmānānalena tu

{dvandvamelāpaka}
viṣaṃ chuchundarīmāṃsaṃ ṭaṃkaṇaṃ samapeṣitam /
mūṣālepamanenaiva kṛtvā tatra vinikṣipet /
yatkiṃcid dvaṃdvayogaṃ tu dhamanena milatyalam

{dvandvamelāpaka}
kaṅguṇītailasampiṣṭamapāmārgasya bhasmakam /
tena praliptāyāṃ dvaṃdvaṃ kṣiptvā dhameddhaṭhāt /
milatyeva na saṃdehastattanmārakavāpanāt

{abhra:: production of abhra-metal-compounds}
hemābhraṃ nāgatāpyābhraṃ śulbābhraṃ gaṃdhakena ca /
sindhūtthahiṃgulābhyāṃ tu tīkṣṇābhraṃ dhamanād dṛḍham

nāgābhraṃ śilayā yuktaṃ vaṅgābhraṃ tālakena ca /
tārābhraṃ baṃgatālābhyāṃ tālavatsarvasattvakam

{abhra:: vaṅgābhra}
milatyeva na saṃdehaḥ pūrvamūṣāgataṃ kṣaṇāt /
śvetābhrakasya sattvaṃ tu vaṅgacūrṇaṃ samaṃ samam

kadalīkaṃdatoyena mardayeṭṭaṃkaṇaiḥ saha /
aṃdhamūṣāgataṃ dhmātaṃ vaṅgābhraṃ milati kṣaṇāt

{abhra:: vaṅgābhra}
guṃjā narakapālaṃ ca ṭaṃkaṇaṃ vanaśigrukam /
strīstanyena samaṃ piṣṭvā mūṣālepaṃ tu kārayet

baṃgaṃ śvetābhrasattvaṃ ca cūrṇitaṃ tatra nikṣipet /
ruddhvā dhmāte milatyeva tārakarmaṇi jārayet

{abhra:: vaṅgābhra}
abhrasattvaṃ vicūrṇyādau tatpādāṃśaṃ tu ṭaṃkaṇam /
pāradaṃ ṭaṃkaṇāṃśaṃ ca kākamācīdravairdinam

piṣṭvā tad golakaṃ peṣyamabhrāṃśairvaṅgapatrakaiḥ /
pūrvamūṣāgataṃ dhmātaṃ vaṅgābhraṃ milati kṣaṇāt

{abhiṣeka (1)}
samyagāvartitaṃ nāgaṃ palaikaṃ kāṃjike kṣipet /
palānāṃ śatamātre tu śatavāraṃ drutaṃ drutam

anena kāṃjikenaiva śatavāraṃ vibhāvayet /
yatkiṃcic cāraṇāvastu tatastaṃ jārayedrase /
abhiṣeko hyayaṃ khyātaḥ kathyate tu matāntaram

{abhiṣeka (2)}
trikṣāraṃ paṃcalavaṇaṃ kāṅkṣīkāsīsagaṃdhakam /
māhiṣaṃ kāṃjikairyuktaṃ tāmrapātre dinatrayam

sthitaṃ gharme punastasmin drutaṃ nāgaṃ vinikṣipet /
tārakarmaṇi baṃgaṃ vā śatavārāṇi secayet

taddravaṃ tāmrapātrastham abhiṣekaṃ vidur budhāḥ /
anena cāraṇāvastu śatavārāṇi bhāvayet

{sāraṇāyāṃ saṃketaḥ}
dvaṃdvitaṃ vyomasattvaṃ ca bījāni vividhāni ca /
dvaṃdvitaṃ vajrabījaṃ ca bhāvitaṃ sārayetsadā

svarṇādi lohamakhilaṃ kṛtaśuddhacūrṇaṃ yojyaṃ pṛthaggaganasattvavare samāṃśam /
taddvaṃdvitaṃ carati sūtavaro'bhiṣiktaṃ vipro yathā madhurapāyasamājyayuktam