Rasaratnākara · Chapter 1.6

RRĀ, 1, 6
{abhra:: aśuddha:: medic. properties}
aśuddhābhraṃ nihantyāyur vardhayenmārutaṃ kapham /
ahataṃ chedayeddehaṃ mandāgnikrimidāyakam

{abhra:: subtypes}
kṛṣṇaṃ pītaṃ sitaṃ raktaṃ yojyaṃ yoge rasāyane /
pinākaṃ darduraṃ nāgaṃ vajraṃ ceti caturvidham

pinākādyāstrayo varjyā vajraṃ yatnātsamāharet /
{pināka:: parīkṣā}
muñcatyagnau vinikṣipte pināko dalasaṃcayam

ajñānādbhakṣaṇaṃ tasya mahākuṣṭhapradāyakam /
{dardura}
darduro nihito hyagnau kurute darduradhvanim

{nāga}
nāgaścāgnigataḥ śabdaṃ phūtkāraṃ ca vimuñcati /
sa ca dehagato nityaṃ vyādhiṃ kuryādbhagandaram

{vajrābhra}
vajrābhrakaṃ vahnisaṃsthaṃ na kiṃcid vikṛtiṃ vrajet /
tasmādvajrābhrakaṃ yojyaṃ vyādhivārddhakyamṛtyujit

{dhānyābhraka:: production}
dhamedvajrābhrakaṃ vahnau tataḥ kṣīre niṣecayet /
bhinnapatraṃ tu taṃ jñātvā meghanādadravāmlayoḥ

bhāvayedaṣṭayāmaṃ taddhānyābhraṃ kārayetsudhīḥ /
{dhānyābhraka:: production}
athavābhrasya bhāgau dvau ṭaṅkaścaikaṃ jalaiḥ saha

dvidinaṃ sthāpayetpātre sūkṣmaṃ kṛtvā prapeṣayet /
baddhvā dhānyayutaṃ vastre mardayetkāñjikaiḥ saha

adho yadgālitaṃ sūkṣmaṃ śuddhaṃ dhānyābhrakaṃ bhavet

{abhra:: māraṇa:: niścandra}
punarnavāmeghanādadravair dhānyābhrakaṃ dinam /
mardyaṃ gajapuṭe pacyātpunaściñcātha sūraṇaiḥ

dravairmustabhavairmardyaṃ pṛthagdeyaṃ puṭatrayam /
evaṃ markadalair veṣṭyaṃ deyaṃ vā mocasampuṭe

niścandraṃ jāyate hyabhraṃ yathā doṣeṣu yojayet /
{abhra:: māraṇa:: niścandra}
goghṛtaistriphalāṃ kvāthaiḥ paktvā ca pūrvavat pacet

pañcaviṃśatpuṭaireva kāsamardyāḥ dravaiḥ pacet /
deyaṃ puṭatrayaṃ kṣīrair mardayecca puṭe puṭe

niścandraṃ jāyate hyabhraṃ jarāmṛtyurujāpaham /
{abhra:: māraṇa}
dhānyābhrakasya bhāgaikaṃ dvau bhāgau ṭaṃkaṇasya ca

piṣṭvā tadandhamūṣāyāṃ ruddhvā tīvrāgninā pacet /
svabhāvaśītalaṃ cūrṇaṃ sarvarogeṣu yojayet

{dhānyābhraka:: māraṇa}
dhānyābhrakamamlaṃpiṣṭaṃ puṭe tapte'mlasecanam /
tat piṣṭvā dhārayet khalve bhāvyamamlāranālakaiḥ

taptaṃ taptaṃ cāranālaiḥ pācyaṃ śodhyaṃ punaḥ punaḥ /
puṭe vā dhamane pācyaṃ viṃśadvāraṃ punaḥ punaḥ

taptaṃ taptaṃ kṣipeddugdhe piṣṭvātha śoṣayetpunaḥ /
dugdhataptaṃ puṭaṃ pacyāttaptaṃ dugdhena secayet

evaṃ trisaptavārāṇi śoṣyaṃ peṣyaṃ puṭe pacet /
peṣayitvā pacetsthālyāṃ lauhadarvyā vicālayet

dugdhasthaṃ ca tato dugdhaiḥ puṭe pacyātpunaḥ punaḥ /
evaṃ saptadinaṃ pacyāddivā caikaṃ puṭe niśi

taṇḍulī vajravallī ca tālamūlī punarnavā /
cāṅgerī maricaṃ caiva balāyāḥ payasā saha

ebhiśca peṣayeccābhraṃ pratyekaṃ taṃ tryahaṃ tryaham /
sthitvā tapte puṭe paścātpratyekena punaḥ punaḥ

piṣṭvā punaḥ puṭe ghṛṣṭaṃ kajjalābhaṃ mṛtaṃ bhavet

{abhra:: māraṇa:: niścandra}
dhānyābhrakasya śuddhasya daśāṃśaṃ maricaṃ kṣipet /
peṣayedamlavargeṇa cāmle bhāvyaṃ dinatrayam

taṃ śuṣkaṃ sampuṭe dhāmyaṃ khadirāṅgārakair dṛḍham /
ūrdhvapātraṃ nirūpyātha secayedamlakena tat

agastyaśigruvarṣābhūmūlaistaṃ patrajai rasaiḥ /
piṣṭvābhraṃ secayettena yad vānyāmlarasena ca

sitāmadhvājyagokṣīrair dadhnāmlaṃ peṣyam abhrakam /
matsyākṣyāḥ karavīrāyāḥ dravaiḥ piṣṭvā tridhā pacet

tato gajapure pācyaṃ niścandraṃ jāyate'bhrakam /
{abhra:: māraṇa:: niścandra}
dhānyābhrakaṃ dravairmardyaṃ matsyākṣītulasīdravaiḥ

mūlajaiḥ kokilākṣasya kumārīśvetadūrvayoḥ /
vyāghrīkandapunarnavayā dinam etair vimardayet

kuñjarākhyaiḥ puṭaiḥ sapta piṣṭvā piṣṭvā pacet punaḥ /
tadvatpañcāmṛtaiḥ pācyaṃ piṣṭvā piṣṭvā tu saptadhā

evaṃ niścandratāṃ yāti sarvarogeṣu yojayet

{abhra:: māraṇa:: niścandra}
dhānyābhraṃ ṭaṃkaṇaṃ tulyaṃ gomūtraistulasīdalaiḥ /
vākucyāḥ sūraṇair alpair dinaṃ piṣṭvā puṭe pacet

jayantyāśca dravaiḥ paścānmardyaṃ mardya tridhā puṭet /
caturgajapuṭenaivaṃ niścandraṃ sarvarogajit

{abhra:: māraṇa}
dhānyābhrakaṃ ravikṣīraiḥ ravimūladravaiśca vā /
mardyaṃ mardyaṃ puṭe pacyātsaptadhā mriyate dhruvam

{abhra:: māraṇa}
dhānyābhrakaṃ tuṣāmlāmlairātape sthāpayeddinam /
yāmaṃ mardyaṃ caturgolaṃ ruddhvā gajapuṭe pacet

evaṃ gokṣīramadhyasthaṃ sthāpyaṃ mardya puṭe pacet /
evaṃ kārpāsatoyena sthāpyaṃ peṣyaṃ puṭe pacet

tato'mlaiścaiva kārpāsair gavāṃ kṣīraiḥ punaḥ punaḥ /
gharmapākaṃ mardanaṃ ca puṭaṃ caivam anukramāt

evaṃ viṃśatpuṭe prāpte mṛto bhavati niścitam

{abhra:: mṛta:: amṛtīkaraṇa}
sarveṣāṃ ghātitābhrāṇāmamṛtīkaraṇaṃ śṛṇu /
triphalotthakaṣāyasya palānyādāya ṣoḍaśa

gomūtrasya palānyaṣṭau mṛtābhrasya palāndaśa /
ekīkṛtya lauhapātre pācayenmṛduvahninā

drave jīrṇe samādāya sarvaṃ rogeṣu yojayet /
{abhra:: medic. properties}
anupānaṃ vinā hyabhraṃ jarāmṛtyurujāpaham

yojayedanupānairvā tattadrogaharaṃ kṣaṇāt /
mṛtaṃ cābhraṃ hared rogān jarāmṛtyumanekadhā

sevitaṃ dehadārḍhyaṃ ca rūpavīryaṃ vivardhayet