Rasaratnākara · Chapter 1.5

RRĀ, 1, 5
{uparasanāmāni}
gandhakaṃ vajravaikrāntaṃ vajrābhraṃ tālakaṃ śilā /
kharparaṃ śikhitutthaṃ ca vimalāṃ hemamākṣikam

kāsīsam kāntapāṣāṇaṃ varāṭīmatha hiṃgulam /
kaṅkuṣṭhaṃ śaṃkhabhūnāgaṃ ṭaṃkaṇaśca śilājatu

ete uparasāḥ śodhyāḥ māryā drāvyāḥ puṭe kvacit

{gandha:: aśuddha:: medic. properties}
apakvagandhaṃ kurute'ti kuṣṭhaṃ tāpaṃ bhramaṃ pittarujāṃ karoti /
rūpaṃ sukhaṃ vīryabalaṃ ca hanti tasmāt saṃśuddhaṃ vidhiyojanīyam

{gandhakaśodhana}
sājyaṃ bhāṇḍe payaḥ kṣiptvā mukhaṃ vastreṇa bandhayet /
tatpṛṣṭhe cūrṇitaṃ gandhaṃ kṣiptvā srāveṇa rodhayet

bhāṇḍaṃ nikṣipya bhūmyante ūrdhve deyaṃ puṭaṃ laghu /
tataḥ kṣīre drutaṃ gandhaṃ śuddhaṃ yogeṣu yojayet

{gandhakaśodhana (2)}
athavārkasnuhīkṣīrairvastraṃ lepyaṃ ca saptadhā /
gandhakaṃ navanītena piṣṭvā vastraṃ pralepayet

tadvahnijvalitā deśe hṛtvā dhāryā hyadhomukhā /
tailaṃ patedadhobhāṇḍe grāhyaṃ yogeṣu yojayet

{sulfur:: śuddha:: medic. properties}
śuddho gandho haredrogān kuṣṭhamṛtyujvarādikān /
agnikārī mahānuṣṇo vīryavṛddhiṃ karoti ca

{vajra:: śodhana}
vyāghrīkandayutaṃ vajraṃ dolāyantreṇa pācitam /
saptāhāt kaudrave kvāthe kaulatthe vimalaṃ bhavet

{vajra:: māraṇa}
trisaptakṛtvastattaptaṃ kharamūtreṇa secayet /
ṣaḍguṇaistālakaṃ piṣṭvā tadgole kuliśaṃ kṣipet

pradhmātaṃ vājimūtreṇa siktaṃ pūrvoditakramaiḥ /
bhasmībhavati tadvajraṃ vajravatkurute tanum

{vajra:: māraṇa}
ūrṇāśṛṅgaṃ paripiṣya piṇḍam etasya madhye tu nidhāya vajram /
piṇḍe'thavādhāya ca vajravallyāḥ puṭatrayaṃ tasya rase vidadhyāt

mṛtyureva bhavedasya vajrākhyasya na saṃśayaḥ

{vajra:: aśuddha:: medic. properties}
aśuddhavajram āyurghnaṃ pīḍāṃ kuṣṭhaṃ karoti ca /
pāṇḍutāpagurutvaṃ ca tasmācchuddhaṃ tu kārayet

{vajra:: subtypes:: colour, caste}
śvetaraktapītakṛṣṇā dvijādyāḥ vajrajātayaḥ /
rasāyane bhaved vipraḥ śvetaḥ siddhipradāyakaḥ

kṣatriyo mṛtyujid rakto valīpalitarogahā /
dravakārī bhavedvaiśyaḥ pīto dehasya dārḍhyakṛt

kṛṣṇaḥ śūdro rujāṃ hanti vayaḥsthairyaṃ karoti ca /
puṃstrīnapuṃsakāścaite lakṣaṇena tu lakṣayet

{vajra:: puṃvajra:: parīkṣā}
vṛttāḥ phalakasampūrṇās tejasvanto bṛhadbhavāḥ /
puruṣāste samākhyātā rekhābinduvivarjitāḥ

{vajra:: stīvajra:: parīkṣā}
rekhābindusamāyuktāḥ ṣaṭkoṇās tāḥ striyaḥ smṛtāḥ /
{vajra:: napuṃsaka:: parīkṣā}
trikoṇāyattā dīrghā vijñeyāstā napuṃsakāḥ

pūrvapūrvamime śastāḥ puruṣāḥ balavattarāḥ /
śarīrakāntijanakā bhogadā vajrayoṣitaḥ

napuṃsakāstvalpavīryāḥ kāmukāḥ sattvavarjitāḥ /
strī tu strīṇāṃ pradātavyā klībaṃ klībe tathaiva ca

sarveṣāṃ sarvadā yojyāḥ puruṣāḥ balavattarāḥ

{vajra:: śodhana}
gṛhītvā tu śubhaṃ vajraṃ vyāghrīkandodare kṣipet /
mahiṣīviṣṭhayā lepyaṃ karīṣāgnau vipācayet

niśāyāṃ tu caturyāmaṃ niśānte vāśvamūtrake /
secayettāni pratyekaṃ saptarātreṇa śudhyati

{vajra:: śodhana}
meghanādā śamī śyāmā śṛṅgī madanakodbhavam /
kulatthaṃ vetasaṃ cātha agastyaṃ sindhuvārakāḥ

eteṣāṃ sajalaiḥ kvāthair vajraṃ jambīramadhyagam /
dolāyantre tryahaṃ pācyamevaṃ vajraṃ viśuddhayet

{vajra:: śodhana}
kulatthakodravakvāthe dolāyantre vipācayet /
vyāghrīkandagataṃ vajraṃ saptāhācchuddhim ṛcchati

{vajra:: śodhana}
vyāghrīṃ kandagataṃ vajraṃ mṛdā liptaṃ puṭe pacet /
ahorātrātsamuddhṛtya hayamūtreṇa secayet

vajrīkṣīreṇa vā siñcedevaṃ śuddhaṃ ca mārayet

{vajra:: brāhmaṇa:: māraṇa}
viprajātyādivajrāṇāṃ māraṇaṃ kathyate punaḥ /
aśvatthabadarījhiṇṭīmākṣikaṃ karkaṭāsthi ca

tulyaṃ snuhīpayaḥ piṣṭvā vajraṃ tadgolake kṣipet /
ruddhvā gajapuṭe pacyādviprajātir mṛto bhavet

{vajra:: kṣatriya:: māraṇa}
karavīraṃ meṣaśṛṅgaṃ ca badaraṃ ca udumbaram /
arkadugdhasamaṃ piṣṭvā vipravanmārayennṛpam

{vajra:: vaiśya:: māraṇa}
balāṃ cātibalāṃ gandhaṃ peṣayetkacchapāsthi ca /
etair vā vāruṇīdugdhaiḥ mriyedvaiśyo'pi vipravat

{vajra:: śūdra:: māraṇa}
sūraṇaṃ lasunaṃ śaṅkhaṃ samaṃ peṣyaṃ manaḥśilām /
vaṭakṣīreṇa mūṣāntarvipravacchūdramāraṇam

{vajra:: strī, napuṃsaka:: māraṇa}
striyasteṣāṃ mriyante ca tattadauṣadhayogataḥ /
napuṃsakamṛtisteṣāṃ caturṇām auṣadhaiḥ samam

{vajra:: māraṇa}
dvivarṣarūḍhakārpāsairmūlaṃ kāntamukhaiḥ saha /
nārīstanyena sampiṣya piṣṭvā dhmātaṃ mṛtaṃ bhavet

{vajra:: māraṇa}
meṣaśṛṅgabhujaṅgāsthikūrmapṛṣṭhāmlavetasaiḥ /
gajadantasamaṃ piṣṭvā vajrīdugdhena golakam

kṛtvā tanmadhyagaṃ vajraṃ mriyate dhamanena tu /
{vajra:: māraṇa}
trivarṣanāgavandhyāstu kārpāsasyātha mūlikā /
piṣṭvā tanmadhyagaṃ vajraṃ kṛtvā mūṣāṃ nirodhayet

pacedgajapuṭe taṃ ca mriyate saptadhā puṭaiḥ

{vajra:: māraṇa}
matkuṇānāṃ tu raktena saptadhātapaśoṣitam /
kuliśaṃ bhāvitaṃ tadakdhrūrṇitāpi manaḥśilā

liptvā ca badarīpatraiḥ veṣṭayitvā pure pacet /
punarlepyaṃ punaḥ pācyaṃ saptadhā mriyate'pi ca

{vajra:: māraṇa}
vajraṃ mahānadīśuktau kṣiptaṃ bhāvyaṃ muhurmuhuḥ /
snuhyarkonmattakanyānāṃ dvayeṇaikena cāhnikam

kṛṣṇakarkaṭamāṃsena piṣṭitaṃ veṣṭayed bahiḥ /
bhūnāgasya mṛdā samyagdhmāte bhasmatvamāpnuyāt

{vajra:: māraṇa}
raktotpalasya mūlaiśca meghanādasya kuḍmalaiḥ /
piṇḍitairveṣṭitaṃ dhmātaṃ vajraṃ bhasma bhavatyalam

{vajra:: mṛta:: medic. properties}
vajramāyurbalaṃ rūpaṃ dehasaukhyaṃ karoti ca /
sevito hanti rogāṃśca mṛto vajro na saṃśayaḥ /
{vaikrānta:: śodhana}
vaikrāntaṃ vajravacchodhyaṃ nīlaṃ vā lohitaṃ ca vā /
{vaikrānta:: māraṇa}
hayamūtre tatsecyaṃ taptaṃ taptaṃ trisaptadhā

tataścottaravāruṇyāḥ pañcāṅge golake kṣipet /
ruddhvā mūṣāpuṭe pacyāduddhṛtya golake punaḥ

kṣiptvā ruddhvā pacedevaṃ saptadhā bhasmatāṃ vrajet /
{vaikrānta:: substitute for vajra}
bhasmībhūtaṃ ca vaikrāntaṃ vajrasthāne niyojayet