Rasaratnākara · Chapter 1.10

RRĀ, 1, 10
tailānāṃ pātanaṃ vakṣye sūryapāke'thavānale /
yantrayogena yattailaṃ grāhyaṃ yogeṣu yojayet

{dhattūra:: oil}
dhattūrabījacūrṇāni vastrapūtāni kārayet /
ālipya kāṃsyapātraṃ tu dhārayedātape khare

sutaptaṃ vastrapūtaṃ ca pātayet tailamāharet /
{śigru:: oil}
śigrupuṣkarabījānāṃ bījasya mārkavasya ca

grāhyaṃ dhattūravat tailamekaikasya pṛthak pṛthak /
yathā dhattūrajaṃ tailaṃ kvāthād gharme samuddhṛtam

tathā sarvatra tailāni saṃgrāhyānyauṣadhāntaraiḥ /
{aṅkoṭa:: oil}
aṅkoṭasyāpi tailaṃ syātkākatuṇḍayā samūlayā

vākucīdevadālyāśca karkoṭīmūlataḥ bhavet /
apāmārgakaṣāyeṇa tailaṃ syādviṣatuṇḍajam

mūlakvāthaiḥ kumāryāstu tailaṃ jaipālajaṃ bhavet /
kvāthena raktamārgasya vākucītailamāharet

kvāthena cendravāruṇyāstailamāragvadhaṃ bhavet /
kākatuṇḍyapāmārgotthakvāthāt tailaṃ samāharet

{kaṭutumbī:: oil}
bījāni kaṭutumbyāśca gomayena viloḍayet /
śuṣkaṃ dhānyatuṣaiḥ sārddhaṃ kuṭṭayecca ulūkhale

nistuṣaṃ taṃ vicūrṇyātha bhṛṅgarājarasaiḥ saha /
mardayitvātape tailaṃ gṛhṇīyātpīḍane sati

{oil from kṛṣṇā and kākatuṇḍī}
kṛṣṇāyāḥ kākatuṇḍyāśca bījaṃ cūrṇāni kārayet /
kāntapāṣāṇacūrṇaṃ caikīkṛtya nirodhayet

dhānyarāśigataṃ paktvā uddhṛte tailamāharet /
dhātrīphalarasair bhāvyaṃ cūrṇaṃ pāṣāṇabījakam

dinaikaṃ ca tato yantre tailaṃ grāhyaṃ ca tailake /
{oil:: from guñjā and karañja}
guñjākarañjaphalaṃ ca naramūtreṇa bhāvayet

saptavāraṃ tato gharme lepayetkāṃsyabhājanam /
uddhṛtya dhārayed gharme tailaṃ patati pīḍanāt

{oil:: jyotiṣmatī}
vardhamānāranālena piṣṭvā cūrṇaṃ vibhāvayet /
jyotiṣmatyutthabījānām ātape tailamāharet

{oil:: putrajīva}
putrajīvasya bījānāṃ cūrṇam agastyabījajam /
āmrātavatprakartavyaṃ tatastailaṃ pṛthak pṛthak

{oil:: bilva}
nārikelāmbunā bhāvyaṃ bilvabījasya cūrṇakam /
dinaikaṃ tailayantreṇa tailamākṛṣya yojayet

{oil:: aṅkola}
nistuṣāṅkolabījānāṃ sukhaṃ kiṃcid vigharṣayet /
pralepayetkāṃsyapātre piṣṭvā caṇakalepane

tanmukhe ṭaṃkaṇaṃ cūrṇaṃ kiṃcit kiṃcit pralepayet /
dhārayedātape tīvre mukhāt tailaṃ samāharet

{keśataila}
śamīcūrṇasamaṃ piṣṭvā chidramāṇḍe niveśayet /
chidrādhaḥ sthāpayed bhāṇḍaṃ chidre keśaṃ ca dāpayet

jalena secayeddravyaṃ chidrādho grāhayecca tam /
tanmadhye dhṛtakeśasya kṣipedūrdhvaṃ puṭaṃ śanaiḥ

tatkṣaṇācchravarūpaṃ ca keśatailamidaṃ bhavet /
{oil:: extraction (gen.)}
apakvabhānupatrāṇāṃ rasamādāya bhāvayet

samastaṃ bījacūrṇaṃ coktānuktaṃ pṛthak pṛthak /
ātape mucyate tailaṃ sādhyāsādhyaṃ na saṃśayaḥ

{oil}
tathaivottaravāruṇyāḥ kaṣāyeṇa samāharet /
tailaṃ samastabījānāṃ grāhayedātape khare

{oil}
sarvabījāsthimāṃsānāṃ śuṣkaṃ piṣṭvā hyanekadhā /
sarvabījeṣu vā tailaṃ grāhyaṃ pātālayantrake

{oil}
vaṃśādisarvakāṣṭhānāṃ nārikelakapālakam /
tuṣadhānyādibījānāṃ garbhayantreṇa tailakam

grāhayetsarvabījānāṃ taṃ ca yogeṣu yojayet

{vatsanābha}
vatsanābhaṃ viṣaṃ svādu dīpanaṃ kaphavātajit /
tridoṣaśamanaṃ yogayuktaṃ sudhāmayaṃ bhavet

bṛṃhaṇaṃ balavīryasya vāḍabāgniśatopamam /
sannipāte pratīkāre prabhavaḥ prabhavo'sya hi

uddhṛtaṃ phalapākānte navaṃ snigdhaṃ ghanaṃ guru /
avyāpakaṃ viṣaharaṃ vātātapaviśoṣitam

raktasarṣapatailena liptaṃ vāsasi dhārayet /
athavāpi yathā prāptaṃ viṣaṃ gomūtrasaṃyutam

ātape tridinaṃ śuṣkaṃ nihitaṃ vīryadhṛk bhavet /
mṛtaṃ sūtābhrakaṃ lauhaṃ viṣaṃ ca tulyavīryakam

tasmādviṣaṃ yogavāhe yojyaṃ yoge rasāyane /
tāni caiva tu mānāni aṣṭau ṣaḍvā caturthakam

mātrātrayaṃ samākhyātamuttamādhamamadhyam /
dātavyaṃ sarvarogeṣu ghṛtāśine hitāśine

kṣīrāśine pradātavyaṃ rasāyanavate nare /
na krodhine na pittāḍhye na klībe rājayakṣmaṇi

kṣuttṛṣṇāśramakarmādhvaśoṣiṇe kṣayarogiṇe /
garbhiṇībālavṛddheṣu na viṣaṃ rājamandire

na dātavyaṃ na bhoktavyaṃ visaṃvāde kadācana /
ācāryeṇa tu bhoktavyaṃ śiṣyapratyayakārakam

anena mantreṇa mardayedbhūmau na sthāpayet /
amṛtamiti vadediti kramo'yam /
oṃ siddhagurubhyo namaḥ /
paramagurubhyo namaḥ /
parātparagurubhyo namaḥ /
parameṣṭhigurubhyo namaḥ /
{vegetable poisons}
saktukaṃ mustakaṃ śṛṅgī vālakaṃ sarṣapāhvayam /
vatsanābhaṃ ca kūrmaśca śvetaśṛṅgī tathāṣṭamam

ityaṣṭau yojayedyoge kālakūṭādi varjayet /
{poisons}
kālakūṭaṃ meṣaśṛṅgī hālāhalaṃ ca darduram

karkaṭaṃ markaṭaṃ granthi hāridraṃ raktaśṛṅgakam /
keśavaṃ daśamaṃ ceti varjanīyaṃ bhiṣagvaraiḥ

saktukādyān prayuñjīta sarvaroge rasāyane /
etadviṣaṃ jāticatuṣṭayaṃ ca vicārya yojyaṃ bhiṣaguttamena

vipro rakṣati yauvanaṃ narapatistadbhūtale pālatāṃ vaiśyaḥ kuṣṭhavināśane ca kuśalaḥ śūdro harejjīvanam /
tasmāccāpi bhiṣagvareṇa nipuṇaistadvedinā bhāvayet kuryādeva tato viṣaṃ nṛpavaro mṛtyuṃjayāya kṣitau

śvetā vā yadi vā piṅgā madhurā ūṣarāpi vā /
lomaśā brahmajātiḥ syātkṣatrajātistu lohitā

pītā vā madhurā kiṃcid vaiśyajātistu dhūsarā /
kṛṣṇā śūdrasya dṛśyeta eteṣāṃ ca bhiṣagvaraiḥ

kṣīraṃ sampūrṇabhāṇḍe'pi viṣaṃ dattvā vicintayet /
jāyate'pi yadā varṇaṃ tadā jātiṃ vinirdiśet

śuklaṃ raktaṃ tathā pītaṃ kṛṣṇaṃ ceti caturvidham /
brahmakṣatraviṭśūdrāṇāṃ jñātavyo jātinirṇayaḥ

kṣiptaṃ dugdhe viṣaṃ vaidyo jānīyāt kramaśo yadi /
śvetaṃ raktaṃ tathā pītaṃ kṛṣṇaṃ coṣṇalameva ca

tutthena ṭaṅkaṇenaiva mriyate peṣaṇādviṣam /
viṣeṣu jaṅgamākhyeṣu viṣaṃ nāgabhavaṃ hitam

idameva mahāśreṣṭhaṃ tridoṣakṣapaṇaṃ kṣaṇāt /
dīpanaṃ kurute sadyo vaḍavāgniśatopamam

saṃnipātapratikāre prabhāvaḥ prabhavo hi saḥ

nāgodbhavaṃ yathāprāptaṃ viṣaṃ gomūtrasaṃyutam /
ātape tridinaṃ śuṣkaṃ nihitaṃ vīryadhṛg bhavet

atimātraṃ yadā bhuṅkte tadārjya ṭaṅkaṇaṃ pibet /
rajanī meghanādā vā sarpākṣī vā ghṛtānvitā

lihedvā madhusarpirbhyāṃ cūrṇitām arjunatvacam /
putrajīvakamajjāṃ vā pibedvā nimbakadvayam

evaṃ viṣavidhiḥ khyātaḥ prayogaṃ ca vadāmyaham /
viṣaṃ trikaṭukaṃ mustaṃ haridrānimbapatrakam

viḍaṅgam aṣṭamaṃ cūrṇaṃ chāgamūtraiḥ samaṃ samam /
caṇakābhā vaṭī khyātā syājjayā yogavāhikā

viṣaṃ pāṭhāśvagandhāśca balā tālīsapattrakam /
maricaṃ pippalī nimbamajāmūtreṇa tulyakam

vaṭikā pūrvavatkāryā vaṭikā yogavāhikā /
nidrāṃ tandrāṃ klamaṃ dāhaṃ saphenaṃ lomaharṣaṇam

śoṣaṃ caivātisāraṃ ca kurute jaṅgamaṃ viṣam /
sthāvaraṃ tu jvaraṃ hikkāṃ dantaharṣaṃ galagraham

phenachardyaruciśvāsaṃ mūrcchāṃ ca kurute viṣam /
na jānāti yadā mantrī viṣaṃ bhakṣeccikitsitam

viṣameva tadādāya majjatyambunidhāviva /
tasmādyatnena saṃrakṣedrājā viṣacikitsakāt

prathamaṃ vahnikharparikāyāṃ manāgbhṛṣṭvā vakṣyamāṇamantreṇa nirviṣaṃ vidhāya gṛhṇīyāditi /
nimbudrave pittaṃ vāratrayaṃ vibhāvya prakṣālya saṃśoṣya gṛhṇīyāditi /
{śilājatu:: origin}
hemādyāḥ sūryasaṃtaptāḥ sravanti giridhātavaḥ /
jatvābhaṃ mṛdu mṛtsnābhaṃ yanmalaṃ tacchilājatu

{śilājatu:: medic. properties}
anaghaṃ cālpakaṣāyaṃ ca kaṭu pāke śilājatu /
nātyuṣṇaśītaṃ dhātubhyaścaturbhyastasya sambhavaḥ

{śilājatu:: from gold:: medic. properties}
hemno'tha rajatāttāmrādvaraṃ kālāyasād api /
madhuraṃ ca satiktaṃ ca japāpuṣpanibhaṃ ca yat

vipāke kaṭu śītaṃ ca tatsuvarṇasya nisṛtam /
{śilājatu:: from silver:: medic. properties}
rājataṃ kaṭukaṃ śvetaṃ śītaṃ svādu vipacyate

{śilājatu:: from copper:: medic. properties}
tāmrād barhiṇakaṇṭhābhaṃ tīkṣṇoṣṇaṃ pacyate kaṭu /
{śilājatu:: from iron:: medic. properties}
yacca guggulusaṃkāśaṃ satiktaṃ lavaṇānvitam

vipāke kaṭu śītaṃ ca sarvaśreṣṭhaṃ tadāyasam /
gomūtragandhaḥ sarveṣāṃ sarvakarmasu yaugikāḥ

rasāyanaprayogeṣu paścimaṃ tu viśiṣyate /
yathākramaṃ vātapitte śleṣmapitte kaphe triṣu

viśeṣeṇa praśasyante malā hemādidhātujāḥ /
{śilājatu:: phys. properties}
lauhaḥ kiṭṭāyate vahnau vidhūmaṃ dahyate'mbhasi

tṛṇādyagre kṛtaṃ śreṣṭham adho galati tantuvat /
daṃśadaṃṣṭrauṣadhādidoṣaharaṇārthaṃ meṣaśṛṅgaṃ bhūrjapatreṇa dhūpayet /
kvāthyadravyaṃ śilājatusamaṃ caturguṇena jalaṃ dattvā caturbhāgāvaśeṣeṇa bhāvayed ityekaḥ pakṣaḥ /
vāgbhaṭṭastu aṣṭaguṇajaladānenāṣṭāvaśeṣe pūrvavadubhayathaiva vyavahāraḥ /
bhadraśilājatu triphalādaśamūloṣṇakvāthe nikṣipya /
kevaloṣṇodake vā sthite ūrdhvaṃ vībhūte paddhapatravat sarvaṃ grāhyam /
tataḥ śivāguḍikoktakrameṇa bhāvanāṃ dattvā viśodhya sālasārādinā bhāvayedyathā /
sālayugmau karañjau dvau khadiraṃ candanadvayam /
gardabhāṇḍo 'rjunaśceha lodhrayugmadhavāsanāḥ

śirīṣāgurukālīyapūgapūtikakarkaṭāḥ /
sālasārādirapyeṣa gaṇaḥ śleṣmagadāpahaḥ

mehagulmārśaḥkuṣṭhārimedaḥpāṇḍurujāpahaḥ /
ebhirdivātape śoṣyaṃ rātrau rātrau ca bhāvayet

draveṇa yāvatā dravyamekībhūyārdratāṃ vrajet /
bhavet pramāṇaṃ nirdiṣṭaṃ bhiṣagbhir bhāvanāvidhau

bhaveddravyaṃ samaṃ kvāthyaṃ kvāthaṃ cāṣṭāvaśeṣitam /
tenārdrasamaṃ dravyaṃ śoṣayetprabalātape

dagdhahīrakaṃ yojyaṃ nikṣipyāgnau dhmāpayitvā nirguṇḍīrasena saptavārān nirvāpya prakṣālya ca gṛhṇīyāt

jāyante vāmarukvāthe janapade grīṣme 'rkatāpārditāḥ /
śītoṣaṇe śiśire ca guggulurasaṃ muñcanti te pañcadhā

hemābhaṃ mahiṣākṣatulyamaparaṃ tatpadmarāgopamaṃ bhṛṅgābhaṃ kumudadyutiṃ ca vidhinā grāhyā parīkṣyā tataḥ

vahnau jvalanti tapane vilayaṃ prayānti klidyanti koṣṇasalile payasā samānāḥ

grāhyāḥ śubhāḥ parihareccirakālajātān aṅgātsphuṭaṃ kharparagandhikatulyavarṇān

{guggulu:: medic. properties}
svāde svāduḥ kaṣāyatiktakaṭuko vīrye vipāke kaṭuḥ /
vṛṣyo mārgaviśodhane 'tiviśadastīkṣṇo vikāśī saraḥ

sāyuṣyaḥ svaradastridoṣaśamano medhāsmṛtiśrīkaraḥ /
dhanyaḥ pāpanisūdano'gnijanano hṛtkaṇṭhaśodhīpunaḥ

{guggulu:: śodhana}
daśamūlakvāthe uṣṇe pūte gugguluṃ parikṣipyāloḍya ca vastrapūtaṃ vidhāya caṇḍātape viśoṣya ghṛtaṃ dattvā piṇḍitavyam

{conch:: śodhana}
śaṃkhanābhiṃ tathāmlena saptavāraṃ hi bhāvayet /
raudre malādikaṃ tyaktvā prakṣālya grāhayediti

{money cowrie:: śodhana}
varāṭīṃ takracāṅgerījambīrāṇāṃ rase śubhe /
prakṣipya bhāvayettāvadyāvacchuklā na paśyati

paścāduddhṛtya gṛhṇīyād varāṭīṃ śuddhimāgatām

{pearl:: śodhana}
bhaumikaṃ jalam ādāya muktāṃ ca vyuṣitāmapi /
tyaktvā malādikāṃ tāṃ ca prakṣālya grāhayediti