Rājataraṅginī · Verses 866-885

girimārgeṇa Gaṅgāyā Mānasaṃ prāpite jale /
kiṃ pūtaṃ Mānasenedam amunā kim u Mānasam

vyaḍambayat svamūrtiṃ yā Mānasapratibimbitām /
vidhāya tattaṭe tena nagarī saphalāyitā

[Ps-JRT 118]
śrīSvayasya yam ānetuṃ prajñā na sphuṭam asphurat /
śrīSekandaraśāho 'pi kuṇṭhotkaṇṭho 'bhavattarām // JRt_B.1149 //
śrīJainollābhadenas tam ānīya Paharaṃ nadam /
prāsiñcad viṃśatikrośāñ chrīmān Svayapure marum // JRt_B.1150 //
durbhikṣavyāptacittānāṃ viśrāntijananān nṛṇām /
Viśrāntisañjñayā kulyā prasiddhābhūt pade pade // JRt_B.1151 //
śrīmān Suyyapurāt pāreVitastaṃ dharaṇer nṛpaḥ /
saṃyojya Paharaṃ tāpavyāpadaṃ sa nyavārayat

ā Pradyumnagiriprāntād Amareśapurāvadhi /
maṭhāgrahārahaṭṭāḍhyāṃ sa Jainanagarīṃ vyadhāt

svargaṃ jetum ivodasthād unnatair aśmaveśmabhiḥ /
saṅkrāntā Jainagaṅgāyāṃ phaṇilokasya yāgamat

Jainagaṅgāṃ Raṇasvāmiprāsādaṃ prāpitāṃ kṛtī /
vyasismarat smerayaśā Haripādakutūhalam

pāreSuyyapuraṃ Jainagirisañjñāṃ purīṃ vyadhāt /
Kailāsācalatulyeva prāsādair abhibhūṣitā

Siddhakṣetre Sureśvaryāṃ prasiddho vilasadyaśāḥ /
rājadhānīṃ niṣiddhārir vyadhāt Siddhipurīm asau

prāsādaśikhare rājā MārtaṇḍĀmaranāthayoḥ /
rājadhānyau vyadhāt saudhadhautadūranabhastale

subhikṣaṃ Suyyarājena pūrvam aṅkuritaṃ kila /
tataḫ prabhṛty atīteṣu bahuṣv api ca rājasu

prajānām alpapuṇyatvān nāvardhata manāg api /
tapobalāt pallavitaṃ puṣpitaṃ phalitaṃ tathā

śrīJainollābhadīnena yugapat tad vyadhīyata /
tapasām atiśuddhatvāt kim iva jñāpakaṃ param

pūrvapuṇyakṣaye rājyāt patanty anye mahīkṣitaḥ /
tasya janmāntare rājyaprāptyai rājyam abhūt prabhoḥ

sa nadīmātṛkāẖ kṛtvā dharaṇīr devamātṛkāḥ /
agrahārān anu kṣmāpo dvijebhyo yad adāt sadā

VarāhakṣetranagaraVijayeśānakādiṣu /
Yavanebhyo 'grahārān sa savihārān svayaṃ dadau

VijayakṣetraVārāhakṣetraŚūrapurādiṣu /
sattradānena sa trāsam api Gotrabhido vyadhāt

bhūmivikrayabhūrjādi kṛtacihnaṃ mahībhujā /
nihnavaprāgabhāvāya dharmādhikaraṇaṃ kṛtam

yo Jayāpīḍadevena prāpto nāgaprasādataḥ /
sa daṇḍam iva tasyādāt tāmraṃ tāmrākaro giriḥ

maṇīn khanibhyaś cālabhyāṃs tadrājye bhūr ajījanat /
ye Jainamaṇayaẖ khyātāḫ padmarāgamadacchidaḥ

saritāṃ saikate nītasikatābhramadaṃ tadā /
kāñcanaṃ kāñcana cchāyāṃ bibhral lokair acīyata