Rājataraṅginī · Verses 826-845

Karpūrabhaṭṭo yaś śrīmān prāṇirakṣo mahībhujaḥ /
guṇināṃ śaraṇaṃ cakre svaguṇais surabhiṃ sabhām

pūrvābdagrahasañcārād uttarābdagrahasthitim /
Ruyyabhaṭṭo vidann āsīd vinaiva gaṇitaśramam

śrīRāmānandapādānāṃ Bhāṣyavyākhyākṣaṇekṣaṇe /
vīkṣate Śāradā kṣoṇīm eva sambhrāntamānasā

GāndhāraSindhuMadrādibhūbhujas tasya bhūbhujaḥ /
grāmyā ivābhavann ājñākāriṇo jitavairiṇaḥ

yuddhe jitaṃ tato baddhaṃ Khuẖkhurendreṇa bhūpatiḥ /
Māladevaṃ Madrarājam ājñayā niramocayat

rājā Rājapurīrājaṃ nayajñas svapadātibhiḥ /
kṣaṇād bhrūbhaṅgamātreṇa Raṇasūham aloṭhayat

Udabhāṇḍapurādhīśaṃ Sindhurājopabṛṃhitam /
sa kandukam ivotthāpya muhur muhur apātayat

Bhoṭṭabhūmau mahīndreṇa Goggadeśe kadācana /
bāṇā Gaurakharāsreṇa guṇair lokāś ca rañjitāḥ

samijjite Śayādeśe krūrādeśo mahīpatiḥ /
suvarṇaBuddhapratimāṃ Yavanebhyo rarakṣa saḥ

kaṣākaraṃ kaṣaṃs tasya nikaṣo Bhauṭṭatejasām /
aprakāśāṃ pratāpo 'tha Malūtanagarīṃ vyadhāt

kevalaṃ hṛdayaṃ śūnyaṃ Bhauṭṭānāṃ nābhavat tadā /
bhūmipālabhayāveśāt kośo 'pi cirasañcitaḥ

prakṛtīnāṃ dadad rājā śeṣopyāyau yathocitam /
pratyavekṣām akārṣīt sa śālinām iva kārṣakaḥ

nāsahiṣṭeva taccāpaṃ tulāṃ ŚārṅgaPinākayoḥ /
dūrakāryārthasādhinyā dhanuṣmattā bhruvaḫ punaḥ

astaṃ yas tamasāṃ kulāni balato netuṃ sadā vāñchati kṣīṇaṃ taṃ vasunābhipūrya śaśinaṃ saṃvardhayaty añjasā /
Kāśyapyām avakāśamātraghaṭanāṃ śākhāmukhai rundhato vṛkṣān vṛṣṭibharaiś ca yo 'sya katamo bhānos tulām arhati

Laddarājasutaṃ rājā Nosrataṃ yam avardhayat /
ahṛtadraviṇaṃ taṃ "sa drohī"ti niravāsayat

Makkadeśāgato jātu pustakāḍambaraṃ vahan /
Sadaulanāmā Yavano rājendraṃ tam upāgamat

guṇān vikatthamānaṃ taṃ guṇirāgī nareśvaraḥ /
upāgacchat pratidinaṃ darśanāyetaro yathā

sa tasya paṭahasyeva rājāpaśyat kramād asau /
antassāravihīnatvaṃ parīkṣāyāṃ vicakṣaṇaḥ

Mlecchamaskariṇi kṣoṇiprāṇeśo nirguṇe 'pi saḥ /
premāṇaṃ nāmucat putre piteva karuṇārṇavaḥ

pradoṣasyeva tamasāṃ durghanasyeva vidyutām /
doṣāṇāṃ bahutā tasya prajās samudavejayat