Rājataraṅginī · Verses 81-100

[Ps-JRT 3]
Lavanyavanyakariṇāṃ darpanirdalanaṃ vyadhāt /
narasiṃho mahātejā vanānām iva pāvakaḥ // JRt_B.84 //
Mallair Balāḍhyacandrasya balino Lahareśituḥ /
harataś Śrīnagaryardhasvāmyaṃ na prābhavat tu saḥ

puṇyaṃ rāśībhavan mūrtam ivātha svābhidhāṅkitam /
Balāḍhyacandras sāndraujā nagarāntar maṭhaṃ vyadhāt

"ko 'yaṃ Khaśo mṛduẖ kaścid asmābhir abhiṣicyate" /
amantrayann idaṃ bhaṭṭā rājñāvagaṇitāś cirāt

"na bhaṭṭo 'haṃ na bhaṭṭo 'haṃ na bhaṭṭo 'ham" idaṃ vacaḥ /
aśrūyatāpi bhaṭṭebhyo nirdiṣṭe bhaṭṭaluṇṭhane

tadaiva Vimalācāryaś śāke kheṣunavāṅkite /
ṣaḍadrinandamāsasya malabhramam avārayat

nirmame nirmamo Rājapurīṃ Rājolakaṃ tathā /
Rājadevas sa rājendur ājanmārjitamaṅgalaḥ

ahāni saptaviṃśāni trayoviṃśāṃś ca vatsarān /
māsatrayīṃ ca rājā sa kṣmāṃ rakṣitvā kṣayaṃ yayau

8) Saṅgrāmadeva (LS 4312-4328)
Saṅgrāmadevas tatputro gotrāsutrāmatāṃ bhajan /
trāsam āsūtrayad rājasiṃhaś śātravadantinām

visrambhāt Sūryam anujaṃ cakre pratinidhiṃ svayam /
kucakrikas sa bhogebhyo lubhyan droham acintayat

śrutadroho mahībhartrā bhītas sa Lahareśituḥ /
Candrasya maṇḍalaṃ Sūryaḫ prāvikṣad udayecchayā

dāruṇe raṇakāle sa Sūryaṃ Candrānvitaṃ tadā /
svarbhānur iva bhūbhānuś citraṃ samam amīmilat

Śamālādhipatis Tuṅgas Sūryaṃ pārśvaṃ nayan madāt /
kṛtayātreṇa rājñātha nīcabhāvam anīyata

mārgair nirinduravibhiś cauravad rajanau bhraman /
viṭatyaktas tatas Sūryo baddhvā rājñā vyapādyata

svalakṣmīṃ rakṣituṃ sākṣāt tasminn āttakṣaṇe prabhau /
akārayann ahibhayaṃ stenāẖ Kalhaṇanandanāḥ

gotrajeṣu baliṣṭheṣu naṣṭāśas so 'tha bhūpatiḥ /
śiṣṭam iṣṭaṃ ca śaraṇam agād Rājapurīpatim

tasmin daṇḍadhare dūraṃ yāte Ḍāmarapheravaḥ /
antrāṇy api viśām āśur niśśeṣaṃ raktapāyinaḥ

rājñā sumanasā tyaktaṃ dvijaiś ca sparśadūṣitam /
bhojyaṃ ḌāmaraḌombānāṃ tad rājyānnam abhūc ciram

svamaṇḍale viśīrṇe 'tha paramaṇḍalam āviśan /
na kair anumato rājā pratyāsannanavodayaḥ

pratyakṣato Rājapuryās sa ripūn samare jayan /
brāhmaṇyāt Kālhaṇīn rakṣan rājyaṃ puṇyaṃ ca labdhavān

ekaviṃśatiśālaṃ sa śrīviśālaṃ viśāmpatiḥ /
godvijānāṃ nivāsāya cakāra Vijayeśvare