Rājataraṅginī · Verses 61-80

[Ps-JRT 2]
tatra hetur Lavanyendrabhayaṃ nānaucitī punaḥ / JRt_B.63ef /
yānty aṅgasaṅgamam anaṅkuśam aṅkayanti rāgaṃ pradarśya hṛdi kampam udañcayanti /
vyāpādayanti viṣavedanayā viśeṣād viśvāsya duṣṭapiṭikā yuvatīś ca hā dhik

vārddhakakṣīṇaśaktitvād viraktā svavadhūr api /
hatvā Kṣukṣaṃ viṣeṇāśu Bhīmaṃ bhogam akārayat

sā devarasya saṅgena śvitrasañcitritā satī /
dānena Mādhavādīnāṃ svapāpaṃ paryaṇīnamat

so 'ṣṭādaśābdān kṣmāṃ bhuktvā satrayodaśavāsarān /
yugāgāṅkābdamāghāntyadaśamyāṃ pralayaṃ yayau

6) Jagadeva (LS 4274-4289)
tataś śrīJagadevas tattanayo vinayorjitaḥ /
tatāna janatāharṣaṃ madhumāsa ivādhikam

parasparaviruddhānāṃ bhṛtyānāṃ tulyavṛttitā /
tatrābhūd utpalābjānām iva sandhyāgamakṣaṇe

ujjahāra mahīnāthaḫ pṛthuvijñānakauśalaḥ /
bhūtale durvyavasthānaṃ śalyaṃ śalyaharo yathā

manaśśalyāyamānas sa nissāmānyaguṇo nṛpaḥ /
kucakrikābalād deśān mantribhir niravāsyata

nigrahānugrahādhāyimantrajñaṃ Guṇarāhulam /
sa prāpat sacivaṃ mitraṃ kapīndram iva Rāghavaḥ

udayaprāptilobhena sūradvijapatī samam /
agātām atha Kaśmīradeśaṃ tau vismayāvahau

ciraṃ bhuktāṃ śriyaṃ tyaktum anīśās samarodyatāḥ /
tanmantraujohutāśāntaḫ prāpuś śalabhatāṃ dviṣaḥ

jitvā kṣmāṃ bubhuje bhūpaś chattracāmarahāsinīm /
lakṣmīm arājalakṣmāṃ tu śrīGuṇākararāhulaḥ

rājā Rajjupure rājadrājatacchattradhāriṇam /
Harṣeśvarasya prāsādaṃ nirmame nirmamehitaḥ

vāllabhyād dvārapatitāṃ Padmenāptavatā tataḥ /
durātmanāvadhi cchannaviṣadānena bhūpatiḥ

rakṣitvā kṣitim abdān sa satryahartūṃś caturdaśa /
nandāṣṭāṅkābdacaitrāntyacaturdaśyāṃ layaṃ yayau

7) Rājadeva (LS 4289-4312)
tatputro Rājadevo 'tha Kāṣṭhavāṭaṃ bhayād gataḥ /
āninye Vāmapārśvasthair dvāreśasya virodhibhiḥ

taṃ Salhaṇākhyadurgāntaḫ praviṣṭaṃ duṣṭaceṣṭitaḥ /
aveṣṭayad balaiḫ Padmo maṇḍalair iva pannagam

upāyanīkṛtāpūrvapādukālokakautukāt /
pramattaṃ ko 'pi caṇḍālo dvāreśam avadhīd raṇe

abhiṣiktas tato bhaṭṭais sa bherīśaṅkhanissvanam /
praṇatānantasāmantas sevakān anvajigrahat

asāmānyo Lavanyendrān sa vāstavyakuṭumbitām /
ninye kṣoṇīparivṛḍho rūḍhabhāroḍhim ādiśan