Rājataraṅginī · Verses 101-120

Kālhaṇapraṇidhīnāṃ sa dviṣāṃ luṇṭhanakāṅkṣiṇām /
caurāṇām iva dīpo 'bhūd dveṣaṇīyo mahīpatiḥ

śākhākrāntadigantas sa sadurāśair durāśayaiḥ /
kavikalpadrumo rājā vicchinnaẖ Kalhaṇātmajaiḥ

nāyakīkṛtya taṃ bhūpaṃ kaviḫ paṇḍitaYaḥśakaḥ /
svoktihāralatāṃ vidvatkaṇṭhabhūṣātvam ānayat

ṣoḍaśābdān daśāhāni sa bhuktvā kṣmāṃ vyapadyata /
jagadbhadro 'tha pañcamyāṃ bhādre 'ṣṭāviṃśavatsare

9) Rāmadeva (LS 4328-4349)
Rāmadevo 'tha tatputro hatvā svapitṛghātakān /
Pṛthvīrāje prajābhāraṃ sarvam eva samarpipat

Ledaryā dakṣiṇe bhāge Sallare sa mahīpatiḥ /
svanāmāṅkaṃ vyadhāt koṭṭaṃ yaśorāśim ivāparam

pramādād bhaṅgam ānītaś Śamālāvijayodyame /
tenOtpalapure Viṣṇoḫ prāsādo nūtanīkṛtaḥ

[Ps-JRT 4]
vaiśākhe māsi pakṣe śaśadharaviṣade triṃśadabde sabhaktyā
dvādaśyāṃ Rāmarāje kṣitim avati nijapreyasīṃ somavāre /
Pṛthvīrājaś Śamālāvijayanasamaye Dasyubhagnaṃ Murāriṃ
sampūrṇāṅgaṃ vidhāyOtpalapuranagare svapratiṣṭhāṃ cakāra // JRt_B.112 //
puṣpaṃ candanavṛkṣasya phalaṃ caṇpakabhūruhaḥ /
apatyaṃ tasya bhūpasya hanta nākāri Vedhasā

Bhiṣāyakapurasthasya kasyacid brāhmaṇasya saḥ /
putraṃ Lakṣmaṇanāmānaṃ putrīyām āsa bhūpatiḥ

akṛtrimapitāputraprītiṃ prītiḫ prathīyasī /
vastv ivocitam ālekhyaṃ tayor atulayattarām

Śrīsamudrābhidhā devī Vimudritasamudrajā /
Vitastāyāṃ svanāmāṅkaṃ nagarāntar maṭhaṃ vyadhāt

trayodaśadinaṃ māsaṃ vatsarāṃś caikaviṃśatim /
kṣmāṃ bhuktvaikonapañcāśe varṣe 'sau dyām agāt svayam

10) Lakṣmadeva (LS 4349-4362)
kathañcil Lakṣmadevo 'tha pāṭyamānāṅgavihvalaḥ /
tām ākaṇṭakinīṃ vallīm iva kṣoṇīṃ babhāra saḥ

kṣatrīkṛto 'pi nāmuñcat svadharmaṃ dvijabhūpatiḥ /
na māṇikyaśriyaṃ dhatte rañjito 'śmāpi jātucit

Vitastāyās taṭe śvaśrūmaṭhopānte maṭhaṃ navam /
niṣpaṅkā nijanāmāṅkam Ahalāmahiṣī vyadhāt

Kajjalena Turuṣkeṇa bahir etyātha maṇḍale /
malinena prajādṛṣṭir utpāṭyāsravatā hatā

trayodaśābdān māsāṃs trīn dvādaśāhaṃ ca bhūpatiḥ /
bhuktvā dvāṣaṣṭavarṣe 'tha pauṣānte sa vyapadyata

11) Siṃhadeva (LS 4362-4377)
Kajjalopadravāt tasmāl Ledarīmātranāyakaḥ /
Siṃhadevo 'tha Saṅgrāmacandreṇākṣobhi bhūpatiḥ

nagarāntar maṭhaṃ kṛtvā Laharendre mṛte sati /
Siṃhadevo Nṛsiṃho 'tha kṣmāṃ rarakṣa kṣayākulām

Siṃhadevo Nṛsiṃhasya Siṃhena guruṇānvitaḥ /
pratiṣṭhāṃ siṃhalagne 'tha Dhyānoḍḍāre 'karot kṛtī