Rājataraṅginī · Verses 784-805

vairikīrtir juhotu svaṃ vikramasya viyogataḥ /
vatāgnisadṛśe rājñaḫ pratāpe sahitaṃ śriyā

Ḍhillīśapīḍitaṃ jātu Jasrathaṃ śaraṇāgatam /
droṇīguhāsu so 'rakṣat tamo 'drir iva bhāskarāt

tasmiñ śāsitari kṣoṇīṃ vinetari durātmanām /
Jayāpīḍapurasthasya bhūmidevasya kasyacit

śaṣpagrāsābhilāṣād vā vidhātur vā niyogataḥ /
udācitāpy agād dhenur mūrtevāśā svadhābhujām

gato Maḍavarājyaṃ sa tīrthasnānāya jātucit /
svāṃ parijñātasaṅketāṃ gāṃ parijñātavān dvijaḥ

saniścayo gṛhaṃ yāntīṃ sāyaṃ tām anugamya gām /
vivādam akarod veśmasvāminā saha tatra saḥ

tau lobhaniścayagrastāv aśāntakalahāv ubhau /
mahīpālasabhāsthāne vivādaṃ kartum udyatau

tayor aśaktayor jetum upapattiṃ parasparam /
śṛṅgāṭāni parīkṣārthaṃ gor agre vyakiran nṛpaḥ

sā bālye grasanābhyāsāc chīghram āghrāya saspṛhā /
gaur abhuṅkta phalānīva na tu tatsantatiś ciram

sabhāyāṃ rājanaipuṇyaṃ stuvatyāṃ kṛtaniścayāt /
daṇḍyenājigrahad daṇḍaṃ bhāṇḍaṃ rājā dvijanmanā

tasya dākṣiṇyadakṣasya prajānāṃ hitahetunā /
putre mantriṇi mitre vā duṣṭe nālakṣyata kṣamā

aparādhaṃ vinā jāyāṃ kṣībo nighnan priyo 'pi san /
Mereśāyo 'pi Yavano vadhaṃ bhūpena lambhitaḥ

śatrupakṣe nikāraṃ sa kṣipan kṣitipurandaraḥ /
akarod ādaraṃ nityaṃ yogināṃ nayayoginām

parākramaś ca nītiś ca tasya teṣāṃ ca bhūbhujām /
karuṇā ca vivekaś ca yasmin rājani rājati

Kāmo viyogivargasya karoty apacitiṃ sadā /
nirvikāras smaro yogivargasyāpacitiṃ vyadhāt

saumyā bhīmā guṇā yasminn avasan navasaṅgamam /
kvānyatra sāgarād dṛṣṭā viṣāmṛtajalānalāḥ

ciraṃ stheyair upātto 'rthipratyarthibhyāṃ dhanagrahaḥ /
tena dharmapravṛttena sadvṛttena nivāritaḥ

kenāpi hetunā pūrvaṃ Laularājadvijanmanā /
bhūprasthadaśakāt prastho vikrīto lekhyapūrvakam ////
bālānāṃ Nonarājādiputrāṇāṃ tam udīrya saḥ /
vikrayābde brahmabhūyaṃ Laularājo 'gamat tataḥ

Nonarājādyasāmarthyāt prasthagrāhair abhujyata /
avikrītam api prasthanavakaṃ balibhis tataḥ

evaṃ kṛte daśaprasthabhoge tair balibhiś ciram /
nagabhogāya kapaṭaṃ kṛtaṃ vikrayapattrake /
[Ps-JRT 112]
vyañjanāgrasthitaikārarūpajñānāya lekhakāḥ /
rekhāṃ pūrve vyañjanānāṃ paścādbhāge kilālikhan // JRt_B.1029 //
kālāntare liper bhedād upary adyatanāḫ punaḥ /
vyañjanānāṃ likhanty eva rekhām ekārabodhikām // JRt_B.1030 //
bhūprastham ekaṃ vikrītam iti vikrayapattrake /
te makārasthitaikārabodhirekhāpade tataḥ // JRt_B.1031 //
bhūprasthagrāhiṇo dhūrtā dakāraṃ samalekhayan /
makāraṃ te śakāraṃ ca kārayām āsur añjasā // JRt_B.1032 //
bhūprastham ekaṃ vikrītam iti vikrayapattrake / JRt_B.1033ab /
vikrītaṃ prasthadaśakam iti varṇān alekhayan // 804ef //
tasmin rājñi vicārajñe Nonarājasya nandanaḥ /
balād dhṛtāṃ bhuvaṃ rājasabhāyām aham ākṣipam