Rājataraṅginī · Verses 764-783

yaśo diśi śriyaṃ sādhau sukhaṃ lokeṣu ropayan /
vyadhāt prakramabhaṅgaṃ taṃ yac chatrūn udamūlayat

ekāntā tigmatā bhānor mradimā śaśinaḫ punaḥ /
sa dvau jetum ivāpuṣyat tatsaṃsargamayīṃ śriyam

asaṅkhyān atra saṅkṣipte tadguṇān varṇayāmi kim /
sṛgālānāṃ guhāmadhye kathaṃ hastipatir vaset

tasmāc chailendravac citre makure sūryabimbavat /
nyasyāmi tadguṇākhyānam atra citte trilokavat

śītoṣṇayor ivorjādau viṣuve 'harniśor iva /
tasya māno 'bhavat tulyas sve pare vāpi darśane

rājā vaṇig ivātyarthaṃ tulāyāḫ puṭayor iva /
sāmyabhaṅgaṃ darśanayor nākṣamiṣṭa kathañcana

śānte siddhāśrame siṃhair mṛgā iva na pīḍitāḥ /
Turuṣkaiḫ puṣkalabhayair brāhmaṇāḫ pūrvavat tadā

doṣākareṇa Sūhena yeṣāṃ saṅkocitā sthitiḥ /
vyakāsayat tato bhāsvān guṇinas tān mahīpatiḥ

randhrair adhogatiṃ prāptā kulyevoddhṛtya bhūbhṛtā /
vidyā pravāhitā tena guṇinā guṇarāgiṇā

doṣacchedakaro rājā kramād bhiṣag ivānalam /
Kaśmīreṣu sadācāram apīpalad upakramaiḥ

ahaṅkārāgadaṅkāro rājā prakṛtivṛddhaye /
darśanānāṃ sa dhātūnām ivolbaṇam aśīśamat

kāladharmeṇa balinā mātsyanyāyapravartanam /
aṣṭalokeśatejo'ṃśadhāraṇasyāsya lakṣaṇam

sa Sūhabhaṭṭasaṃsparśaduṣṭāyāś śuddhaye bhuvaḥ /
pratāpāgniṃ dhruvaṃ dīptamahākāśam ajijvalat

rājñas sañcinvato mantraprapañcaṃ pañcadhā sthitam /
jigīṣayeva tasyārivargaḫ pañcatvam āśrayat

anityabāhyavidveṣinirjayastutisaṃstavaḥ /
nityāntassthārisaṃhartus tasya pratyuta garhaṇā

śakto 'pi Kāśyapīśakraś śakyān evābhyaṣeṇayat /
vyomni yātrāṃ karoty arkas satāre na tu soḍupe

nājigīṣat sa tejasvī śatrūn vibhavatṛṣṇayā /
harir māṃsādilobhena hinasti na hi hastinaḥ

śaileṣu taddviṣo bhānupratāpādhidavaśramaiḥ /
prāyaścittīyituṃ pañcatapastvaṃ dhruvam āśrayan

prāvartiṣṭa mahīṣṭho 'pi notpathena sa jātucit /
rākendur na niśārambhaṃ vinā jātv apy udeti yat

"garvaṃ pravṛddhā vāstavyā hīnā maiva kṣayaṃ gaman" /
iti nītividā rājñā tebhyo balir agṛhyata