Rājataraṅginī · Verses 744-763

ato yāvad vayaṃ prāptās tvatsevāvidhisiddhaye /
bhavadbhis tāvad atraiva sthātavyaṃ parvatopari"

Madreśasya sa sandeśo mandair Yavanapuṅgavaiḥ /
svayaśolabdhaye jñāto madasammūḍhadṛṣṭibhiḥ

rājñi mūḍhe 'varūḍhe 'tha mānād iva mahīdharāt /
dhvajair vāyucalair yātaṃ Khuẖkhureśabalād bhiyā

dhāvadaśvabalakṣodāt tanīyasi mahītale /
harṣabhīrasasambhede majjati sma Phaṇīśvaraḥ

aśvakṣuṇṇe 'srasaṃsikte bhūtale 'sikuśāñcite /
vīrāḫ prāṇān pratāpāgnau tatrājuhuvur āhave

Āliśāhas tato rājā Sindhau pravahaṇaṃ yathā /
abhāgyadurmarudvegād abhajyata raṇārṇave

23b) Sulṭān Zayn al-‘Ābidīn (LS 4496-4546)
viśvāndhaṅkaraṇāndhakāranikaragrastasya sūryodayaṃ hemante himamārutair hatadhṛteḫ puṣpākarābhyāgamam /
duṣṭakṣmāpatitarjitasya jagato nirdoṣaleśaṃ prabhuṃ lokeśo janayan vyanakti nitarāṃ kāruṇyam atyujjvalam

śrīJainollābhadīno 'tha Kaśmīrān apakalmaṣaḥ /
anukūlo vidhāteva prāviśad vijayorjitaḥ

satāṃ stutyā diśāṃ bheryā mukhāni dhvanayann ayam /
paurāṇāṃ prāṅ manaḫ paścād rājadhānīṃ nṛpo 'viśat

dhīnairmalyaṃ janasyāho jātaṃ rājño 'bhiṣekataḥ /
pratāpo vairiṇāṃ śāntas tasmiṃś chatrāṇi bibhrati

tannītiḫ pūrvarājeṣu kuṇṭhotkaṇṭhāḫ prajā vyadhāt /
guṇātiśāyanī yā ca śarkarekṣuraseṣv iva

pūrvarājavyavasthās sa vinaṣṭā navayann abhūt /
śiśiropahatā vallīr vasanta iva bhūpatiḥ

parasparādhikaṃ śatrūñ jayadbhir durjayān api /
śastrair mantrā jitās tasya mantraiś śastrāṇi ca prabhoḥ

Kāntyāṅgaṃ vadanaṃ Vācā Śriyoraẖ Kṣamayā manaḥ /
śritaṃ paśyanty agād dūraṃ Kīrtir īrṣyāvaśād iva

rājñaẖ Kalidaśāmadhye dharmyā sāmrājyapaddhatiḥ /
antardaśeva śuśubhe śubhā Kṛtayugasya sā

bhoge sakhā naye mantrī vivektā śāstranirṇaye /
śrīMuhammadakhāno 'bhūt Kaśmīrendrasya sodaraḥ

kim anyad rājyam evāsīc chattracāmaravarjitam /
śrīMuhammadakhānasya Kaśmīrendraprabhāvataḥ

vasanta iva kāmasya vayasyo bhūpater abhūt /
Khuẖkarādhipatis tasya bhṛtyeṣv abhyadhikapriyaḥ

durvyavasthāṃ nivāryāyaṃ deśe 'smin Mlecchanāśite /
iti rājyapariprāptiphalaṃ yāvad acintayat

tāvad drohocitaṃ karma drogdhāro rājavallabhaiḥ /
apṛṣṭvaiva mahīpālaṃ nītā vītabhayais sphuṭam