Rājataraṅginī · Verses 724-743

mantrimantrair avāryāṇāṃ divase 'py anivartinām /
rakṣasām eva Kaśmīrās tadā hastavaśaṃ gatāḥ

arājakaṃ varaṃ rājyaṃ na svāmī tādṛśaḫ punaḥ /
abhūṣaṇau varaṃ karṇau na punar lohakuṇḍalam

[Ps-JRT 110]
himād agnis tamas sūryāc chilā vyomnas tadāpatat /
yat pālako 'pi bhūpālas sarvalokakṣayo 'bhavat // JRt_B.941 //
sadma tuṅgaṃ varo vājī svacchaṃ vāso maṇir mahān /
svīkṛtaṃ Yavanais tat tad yad yac chobhāvahaṃ prabhoḥ

akārṣīt pañcaṣān māsān rājyaṃ sa jaḍanāyakaḥ /
prajāpāpavipākena na punas svena karmaṇā

mālinyaṃ sumanaḫprathāḫ prathayate dainyaṃ nidhatte dṛśaḥ sūryālokatiraskṛtaṃ ca kurute saṃhāram āśā nayan /
unnidraẖ kam upadravaṃ na tarasā kurvīta dhūmodgamo noddyotetatarāṃ śikhī yadi mahājvālākalāpākulaḥ

śrīSekandaradattasya rājyasya ṛṇam ātmanaḥ /
nivārayitukāmena svalakṣmīphalakāṅkṣiṇā

Madrendradveṣapūrṇena Khuẖkhurasvāminā tataḥ /
navarājo 'rthito dūtair nijadeśāgamaṃ prati

nakro na cej jalanidher bahir abhyupeyāt kākas tyajen na varapādapam unnataṃ cet /
ākhur na ced gahanagartaguhāṃ vimuñced dhantavyatāṃ katham avāpnuyur eva tat te

"āśrayo yuvarājasya maddviṣo dīyate 'munā" /
Jasrathaṃ prati bhūpālaẖ krodhād ity abhyaṣeṇayat

Mlecchacchāditamāhātmyair udvignais sacivair nijaiḥ /
aniṣiddhodyamamatir dūtair ubhayavetanaiḥ

yuktyopodvalitaśraddhas tathā dvairājyajīvibhiḥ /
navarājodayaṃ lekhamukhena prāpayiṣṇubhiḥ

prasādalobhād Yavanair atimātrakṛtastutiḥ /
navarājajayodrekaśravaṇabhraṣṭasāhasaiḥ

svasainyair dainyacakitair nindyamānodyamo nṛpaḥ /
Mallekaṃ Jasrathaṃ jetuṃ prasthānam akarot tataḥ

abhyamitrīṇatāṃ tasya Kaśmīrendrasya gacchataḥ /
āsīn mitrasya sāmmukhyaṃ na mitrāṇāṃ mahībhujām

[Ps-JRT 111]
svasyātyaunnatyam ālakṣya śaṅkamāno 'tha pātakam /
Khujyākādas samaṃ mantram amantrayata mantribhiḥ // JRt_B.954 //
"mantravikramamukhyāni lakṣaṇāni kva bhūbhujām /
ayaṃ bāliśabhāvasya bhājanaṃ kva janādhipaḥ // JRt_B.955 //
asmābhir nihitāś cāsminn upadeśā hitā api /
pratīpaṃ yānti śaśinaḫ paṅkaje kiraṇā iva // JRt_B.956 //
prāg eva yuvarājo 'bhūd ajayyo 'sahyasāhasaḥ /
viśeṣeṇādya Madreśadveṣāj Jasrathamānitaḥ // JRt_B.957 //
rājyāśrayeṣu nāsmāsu viśvāsī nūtano nṛpaḥ /
hāralubdhasya dāmnas tu hāro na maṇibhṛtphaṇī // JRt_B.958 //
tasmād asmābhir ete na yuvarājo vijīyate /
yogyāḫ prāhuṇakenaiva gṛhe ghnanti bhujaṅgamam // JRt_B.959 //
jīyamāne narendre na yuvarāje niraṅkuśāḥ /
āyāntu maṇḍalaṃ sarve sādhayāmaś cikīrṣitam" // JRt_B.960 //
iti sammantrya mantrī sa yuvarājābhiyojane /
sodyamasya narendrasya hetukartṛdaśām agāt // JRt_B.961 //
yatra yatrāgaman Mlecchakaṭakas sa madotkaṭaḥ /
tatra tatra rajovyājāt tamo mūrtam adṛśyata

pālanīyeṣu deśeṣu Rājapuryādiṣūddhataḥ /
paradeśeṣv ivākārṣīt sa luṇṭhanaparābhavam

prāpte 'tha Mudgaravyālanāma sthānaṃ mahīpatau /
sandeśam ity amandaujāḫ prāhiṇon Madrabhūpatiḥ

"pattilokas sasampattir vājino vegarājinaḥ /
bhaṭā raṇodbhaṭās santi kaṭake tava yady api

tathāpi cchalabandheṣu prasiddheṣu mahītale /
yūyaṃ Khuẖkhurayuddheṣu naiva nāma pragalbhatha

vayam eva tu jānīmaẖ Khuẖkhurāṇāṃ raṇacchalam /
ahir eva bhujaṅgasya padaṃ jānāti netaraḥ