Rājataraṅginī · Verses 704-723

dehāt pṛthaṅ nivasato madbhujasyeva te vata /
dṛṣṭvā parākramaṃ śaṅkā madaśaktau kathaṃ bhavet

etāvad api vākyaṃ me yadi naivānutiṣṭhasi /
tvayi saṅkalpitāś śeṣās tad āśās santu dūrataḥ"

nirbandheneti jalpan sa tīrthārthaṃ dharaṇīpatiḥ /
yuvarājaṃ haṭhād rājyabhāram agrāhayac cirāt

23a) Sulṭān Zayn al-‘Ābidīn (LS 4494-4495)
"śrīJainollābhadīnākhyas suratrāṇo bhavan bhavān /
ciraṃ rājyaṃ kriyād" evaṃ rājāsyāśiṣam abhyadhāt

tīrthadarśanalobhena svadeśān niragān nṛpaḥ /
na punar yuvarājasya cittāt premārgalāñcitāt

kośasārāṇi ratnāni vājiratnāni cārpayan /
bhrātaraṃ vasatīr dvitrās so 'nvagāt premagauravāt

mārge kleśaṃ prayatnena siddhiṃ tīrthaphalālpatām /
uktvā mārge khalā rājñas tīrthaśraddhām akhaṇḍayan

svajāmātus tiraskāraṃ manyamānena māninā /
Madrendreṇātha bhūpālo haṭhāt tīrthān nivartitaḥ

prāptāyāṃ śaradi śreṣṭhadaśāyām iva bhūpatim /
Madrarājas tam ādāya Kaśmīrān pratyagāt tataḥ

bhrātur āgamanāt tuṣṭyā Madrāsāragrahād ruṣā /
navarājaḫ prasāde ca kāluṣye ca nimagnavān

[Ps-JRT 109]
devasyopadravaṃ kārṣīn mā Madrendracamūr iti /
iyeṣa Ṭhakkuraṃ rājā taṃ niroddhuṃ visṛṣṭavān // JRt_B.927 //
yuddhaṃ vinānivartinyāṃ senāyāṃ Madrabhūpateḥ /
ājñāṃ vinākṣamo yoddhuṃ vyāvartata sa Ṭhakkuraḥ // JRt_B.928 //
kṣudreṣv atha sa Madreṣu yuvarājo mahāmatiḥ /
bhrātus snehād ruṣaṃ tyaktvā rājyatyāgaṃ svayaṃ vyadhāt

22b) ‛Alī Šāh (LS 4495-4496)
tan nyastaṃ divasāvasānasamaye sūryasya tejo nijaṃ pratyūṣe pratipādayann atiśayaślāghyasvatejā bhavan /
vahnir yajvakulais tato 'pi divase śraddhānubandhākulais tejovṛddhimuṣā navena haviṣā yajñeṣu santarpyate

Ṭhakkurair anvito rājā pavanaẖ kusumair iva /
Kaśmīrebhyo gatas sarvair deśādhīśair natas tataḥ

sukhaṃ tāvad agāhiṣṭa vītanakrāṃ nadīm iva /
Ṭhakkurair ujjhitāṃ Madracamūẖ Kaśmīramedinīm

atha vistīrṇam ākrāntam Āliśāhena bhūbhujā /
pitryaṃ siṃhāsanaṃ tena na tu sajjanamānasam

udyaccheta kathaṃ jaḍadyutir aho dūrollasallāñchano gacched dīptakaro na ced dinakaro lokāntaraṃ svecchayā /
vīreṇātyavahelayā viracito 'pakṣo jaḍaẖ kātaraḥ sambhāvya svaparākrameṇa vijayaṃ viśvaṃ tṛṇaṃ manyate

śākhābhaṅgena sacchāyam udyānaṃ plavagā iva /
maṇḍalaṃ kṣobhayām āsus Turuṣkā rājasevakāḥ

kātarān nāma bhūpālād aniṣpannaniyantraṇaḥ /
Yavano Merakaṃsāro vyadhān maṇḍalaviplavam

akārṣīn malino bhṛṅgas saṅkucantīr ivābjinīḥ /
pauranārīr anāryas sa haṭhasambhogadūṣitāḥ

mahākarair madenāndhaiḫ paṅkasaṅkulatāṃ bhajat /
akṣobhi maṇḍalaṃ svacchais saro marugajair iva