Rājataraṅginī · Verses 664-683

kṣmā rūkṣā kṣāmam aśanaṃ vyāyāmo vedanāmayaḥ /
jīvannarakatāṃ teṣāṃ videśo 'gād dvijanmanām

dhāṭīphaṇīndrabhītīvratāpasvalpāśanāturaiḥ /
mārge 'nekair dvijair mṛtyulābhāt sukham amanyata

kva ca snānaṃ kva ca dhyānaṃ tapaẖ kva ca japaẖ kva ca /
bhikṣārtham aṭatāṃ grāmān agāt kālo dvijanmanām

dvijānām upakāro 'bhūd apakāramukhād aho /
yat tannirvāsitās sarve pāpaṃ tīrtheṣv anāśayan

videśam agatāś śuṣyatkalatratrāṇacintayā /
Mlecchaveṣā dvijāẖ kecit Kaśmīreṣv eva cābhraman

vicchettum icchatā vidyāṃ tenāpahatavṛttibhiḥ /
laḍitaṃ prativeśmāgraṃ piṇḍīlobhād dvijaiś śvavat

Turuṣkadarśane bhaktyā na tu dveṣeṇa sa dvijān /
vyaplāvayad ataś cāsmin hatyā na prajagalbhire

ity ākhyac ca sa evaiṣāṃ sa tasya parihāradaḥ /
dveṣadyotanaśaktānāṃ kāryāṇām eva darśanāt

ratnākaraṃ yam āśritya brāhmaṇā jagatībhṛtaḥ /
pakṣarakṣāṃ vyadhus so 'bhūt Kṣudrabhaṭṭo 'sya vallabhaḥ

Malānordīnanāmānaṃ Yavanānāṃ paraṃ gurum /
vaidagdhyāc chaṅkamānas "sa drohī"ti tam abandhayat

yataḫ prabhṛti sa prāpad rājyam acchattracāmaram /
tataḫ prabhṛti rogārtir iva darśanadūṣaṇā

svapne 'pi nātyajat Sūhabhaṭṭaṃ ghaṭṭitavairiṇam /
bhogas sadvāsanā cātiśuddhānāṃ tapasāṃ phalam

tasyaiva phalapūrṇānām ṛtūnām iva mantriṇām /
mānasya hānisampattī bhāsvato 'dhīnatāṃ gate

ekasmiñ Śāhikhāne sa dṛṣṭvā mantraparākramau /
atyantacintācakito nidrāṃ nāpat kadācana

paśyann evāvilaṃ Sūhasarpaṃ saviṣayā dṛśā /
Śāhikhānapradīpo 'bhūt tamas saṃhartum akṣamaḥ

dvijātipīḍayā śāstranindayā drohacintayā /
cikitsayā ca tasyābdair yātaṃ tricaturais tathā

[Ps-JRT 107]
dāyavān iva doṣo 'sya hetumātraparīkṣayā /
saṃvṛtaujā vyalambiṣṭa Śāhikhānasya bādhane // JRt_B.891 //
valīmukhamanojñas sa prajābhāgyabalodayāt /
anaiṣīd bhagnatāṃ Śāhikhānacintāmaṇiṃ na ca // JRt_B.892 //
prajāpuṇyodayenaiva prerito duṣkṛtotthitaḥ /
kṣayāmayo duścikitsyo dvijarājam aśoṣayat

anālokyaivendor udayam agamiṣyad yadi śamaṃ samantān nādityopaladahanarāśivyatikaraḥ /
kim adrakṣyan nāyaṃ tadudayavaśasrāvituhinadyutigrāvāmbhobhiẖ kṛtadharaṇitāpopaśamanam

varṣāṃs tricaturān anyāñ jīvec cet sa na kiṃ tataḥ /
Śāhikhānodaye paśyed ihaiva svāṃhasāṃ phalam

jīvaty eva tatas Sūhabhaṭṭe bhītyā palāyitam /
viśrāmya Laddarājaṃ drāg HaṃsaGaurau babandhatuḥ