Rājataraṅginī · Verses 644-663

mantriṇā Sūhabhaṭṭena pālitair lālitair janaiḥ /
jñāto 'darśanamātreṇa svaryātaś śrīSekandaraḥ

śrīSekandaraśāhir yaṃ Śobhādevyās svam ātmajam /
utpiñjānām abhāvārthaṃ svadeśān niravāsayat

Udīcīpatinā rājaputratvād abhinanditam /
Kaśmīrān āyayau jetuṃ tam ādāyātha Mahmadaḥ

Turuṣkakaṭakais sārdhaṃ śrutvā Pirujam āgatam /
vyasṛjat tannirodhāya Sūhaś śrīLaddaGaurakau

mantraiś śrīLaddarājasya vikramair Gaurakasya ca /
sā Turuṣkacamūś śāntā vyādhir dānajapair iva

vītabhītis tato mantrī kampanādhipatiṃ vyadhāt /
Laddarājaṃ Gaurabhaṭṭaṃ Kramarājyeśvaraṃ ca saḥ

sandhyākṣaṇa ivodagre Sūhe rañjitabhūbhṛti /
nābhūtām uditau rājayuvarājau ravīnduvat

śyeno hanti patatriṇo mṛgapatir niṣpātayiṣṇur mṛgān bhidyante maṇayo 'pi vajramaṇinā khātā khanitrair mahī /
puṣpāṇīva ca bhāsvatā grahagaṇās sūryeṇa nirdhūnitāḥ prāyeṇātra vilokyate paribhavatrāsas sajātīyataḥ

dvijātipīḍane 'nena prerito 'pi muhur muhuḥ /
śrīSekandarabhūpālaẖ karuṇākomalāśayaḥ

Yavanābdhimahāvelāṃ yām akārṣīt kathañcana /
ullaṅghitā dvijātīnāṃ tena daṇḍasthitis tataḥ

darśanāntaravidveṣī pradoṣas tamasāṃ nidhiḥ /
yāgayātrādi nāgānāṃ durvṛttas sa nyavārayat

śaṅkamānaẖ kṛtātaṅkasaṅkocānāṃ dvijanmanām /
videśagamanāj jātirakṣām akṣāmamatsaraḥ

"mokṣākṣaraṃ vinā mārgo dātavyo naiva kasyacit" /
ity ādiśad aśeṣān sa mārgarakṣādhikāriṇaḥ

tato mīnān iva vyādho dattabandhe sarijjale /
dvijātīn atidurjāto deśe 'smin nyagrahīttarām

tadbhayānalasantāpaṃ pāpaṃ ca bahavo dvijāḥ /
agnijvālāpraveśena sahasaiva nyavārayan

kecid viṣeṇa pāśena pare toyena cāpare /
bhṛguṇā vahninā cānye viprā bhītyā vipedire

rājadrohasahasreṇa rakṣituṃ rājavallabhāḥ /
na tv ekam aśakan vipram etasmin dveṣadūṣite

durvahatvena nindan sa rājyabhāram alaṃ khalaḥ /
aślāghata dvijākrandaśravaṇānandalābhataḥ

gṛhād dhūmyeva viprāṇāṃ paṅktir jātyabhimāninī /
ruddhadvārāt tato deśād apamārgair apāsarat

tyaktvāpi pitaraṃ putras taṃ pitā cāgamad dvijaḥ /
Sūhāntake kṛtākṣepe videśaṃ paralokavat