Rājataraṅginī · Verses 624-643

prāpte Muhammade mārgapatau viśvāsato gṛhān /
sa Govindakhaśaś citte kṣaṇam evam acintayat

"mantriṇā Sūhabhaṭṭena rājyopadravarakṣiṇā /
dvairājyakārī durbuddhir vinyavāri Muhammadaḥ

[Ps-JRT 102]
līlevāpakriyā kartur apakāryasya sā punaḥ /
nāḍīva vraṇitā jātu na śuṣyati kathañcana // JRt_B.831 //
pariṇāme 'tiduẖkhena sukhenāsukhasīmani /
apathyeneva kiṃ nas syāt sevitenāmunā phalam // JRt_B.832 //
rājadrohodyataḫ pāpī nissāmarthyo bhayād ayam /
mama deśaṃ praviṣṭo 'dya rakṣaṇīyo na yujyate"

[Ps-JRT 103]
iti sammantrya viśvastajihmago Mahmadaṃ tataḥ /
suptaṃ harim iva vyādho Govindas taṃ nibaddhavān // JRt_B.834 //
anekenātha ratnena nissapatnatvalipsayā /
ekaṃ Sūhas sa puṃratnam akrīṇān Mahmadaṃ tataḥ // JRt_B.835 //
tāvac ca Sūhabhaṭṭena visṛṣṭāś śreṣṭhabuddhayaḥ /
anveṣakā gṛhaṃ prāptā Govindasya Khaśeśituḥ

maitrīm ullaṅghya nirvyūḍhām āsritasya ca rakṣaṇam /
Muhammadaṃ nijam mitram arpayām āsa durmatiḥ

suptaṃ harim iva vyādho yadā baddhvākṣipat Khaśaḥ /
paśuvat taṃ tadā te 'tha Kaśmīrān ānayan drutam

mantrārditasya phaṇinaḫ plavagāś capeṭair vyādhās saṭāvighaṭanān nirasor hareś ca /
baddhasya kātaratayābalino 'vamānair nindāṃ vinā kim iva nāma paraṃ labhante

[Ps-JRT 104]
karoṭīṭaṅkanāghaṭṭaradaṭāṅkārakuṭṭanaiḥ /
paryabhūyata jihmena Sūhabhaṭṭena Mahmadaḥ // JRt_B.839 //
mānyaṃ kṛtāvamānaṃ taṃ śaṅkamānaḫ palāyanam /
Bahurūpe mahādurge Sūhaẖ kārām avīviśat

[Ps-JRT 105]
hitaiṣiṇo nijaprāṇair devasya svānujīvinaḥ /
viṣaye 'smin hy adhīkāras tenāmandam adhīyata // JRt_B.841 //
vidyuddyotabharair niśi pravasataḫ pānthān navo vāridaḥ pañcāsyo vanavāsino mṛgagaṇān vyāvṛttya viprekṣitaiḥ /
gatyā vakragatair dineśatanayo rāśīn ajādīn vidhir bhadrābhāsavilokanair duritino viśvāsya paryasyati

Śāhanāmnyās tato dāsyā mukhena pratibodhitaḥ /
Mahmado nijadhātreyair bandhasthānād akṛṣyata

sa hi "svedākulas snānaṃ karomī"ti svarakṣakān /
bhrāmayitvā praviśyātha snānakoṣṭhaṃ tato 'calat

dhātreyair vihitaṃ sandhibhedasthānam upetya saḥ /
haṃsaẖ Krauñcāntaram iva nissṛto 'tha Muhammadaḥ

roṣād iva srutiṃ hantuṃ niṣpatan nirjharāmbhasām /
bhṛgor iva tato durgād adāj jhampām akampitaḥ

aśaknuvann amuṃ roddhuṃ pāṣāṇā rakṣiṇo na ca /
nirjharās tu tadaṅghristhanigaḍadhvaniḍambaram

dhātreyā Mahmadasyātha bhañjanto nigaḍān dṛḍhān /
Sūhabhaṭṭam amanyanta bhagnaṃ sākaṃ svabandhubhiḥ

[Ps-JRT 106]
himagamanataẖ klāntasvānto himaṃ manute 'nalaṃ taṭatarumukhaṃ nāvā gacchan vrajat paripaśyati /
valati nitarāṃ viśvaṃ viśvaṃ vivetti ca mūrchitaḥ saralahṛdaye śaṅkāgrastas tanoty atiśaṅkitām // JRt_B.849 //
Muhammadavad evāsmiñ śaṅkamānaḫ palāyanam /
vṛddhaṃ nipītakośo 'pi mārgeśam avadhīd dvijaḥ

hate mārgapatau vṛddhe Sūhabhaṭṭena durdhiyā /
amandanindam ākrandan pitarīvākhilā janāḥ

ṛkṣais saṃlakṣayann āśāviśeṣaṃ niśi niśy atha /
pakṣīva nīḍabhraṣṭas sa Sūho lokabhayād ayāt

ahas tasya vihastasya rātrir āsīn niśā dinam /
viparyeti dhruvaṃ sarvaṃ vidhau vidhuratāṃ gate

kārānāvaṃ samullaṅghya calitaṃ taṃ smaran muhuḥ /
Muhammadatimiṃ Sūhadhīvaraś śucam āsadat